വൈത്തിരി : സമൂഹ മാധ്യമങ്ങളിലെ വ്യാജ പ്രചാരണങ്ങളെ തുടര്ന്ന് വിനോദസഞ്ചാര കേന്ദ്രമെന്ന് തെറ്റിദ്ധരിച്ച് വേങ്ങക്കോട് എസ്റ്റേറ്റ് ബംഗ്ലാവ് തേടിയെത്തിയത് നൂറുകണക്കിന് സഞ്ചാരികള്. വേങ്ങക്കോട് എസ്റ്റേറ്റിലെ പഴയ ബംഗ്ലാവ് വിനോദ സഞ്ചാര കേന്ദ്രമെന്ന പ്രചാരണമാണ് യുവാക്കളെ ഇവിടേക്ക് ആകര്ഷിച്ചത്. നിരവധി പേരാണ് കഴിഞ്ഞദിവസങ്ങളില് ബൈക്കുകളിലും മറ്റുമായി ഇവിടെയെത്തിയത്.
ചിലര് തളിമല വഴിയും മറ്റുള്ളവര് ചുണ്ട വഴിയുമാണ് എത്തിയത്. തളിമലക്കും ഒലിവുമലക്കും ഇടയിലുള്ള പാത്തി എന്ന സ്ഥലത്ത് ആളുകള് വന്നുനില്ക്കുന്നത് നാട്ടുകാരുടെ ശ്രദ്ധയില്പെട്ടു. സംശയം തോന്നിയ നാട്ടുകാര് പോലീസില് വിവിരമറിയിച്ചു. പിന്നാലെ നാട്ടുകാര് ജനകീയ കൂട്ടായ്മയുണ്ടാക്കി തടയുകയും കാര്യങ്ങള് പറഞ്ഞുമനസ്സിലാക്കി ഇവരെ തിരിച്ചയക്കുകയും ചെയ്തു. എസ്റ്റേറ്റ് ബംഗ്ലാവിലേക്കുള്ള കവാടത്തില് പ്രവേശനമില്ലെന്ന ബോര്ഡും സ്ഥാപിച്ചു. സഞ്ചാരികള് എത്തുന്നതറിഞ്ഞ് വൈത്തിരി പോലീസ് ഏറെ നേരം സ്ഥലത്ത് ക്യാമ്പ് ചെയ്തു.
