ആലുവ : ഒന്നര വര്‍ഷമായി വീട്ടുതടങ്കലില്‍ പാര്‍പ്പിച്ചിരുന്ന അറുപതുകാരനെ ജനപ്രതിനിധികളും ആരോഗ്യ പ്രവര്‍ത്തകരും ചേര്‍ന്ന് രക്ഷപ്പെടുത്തി. അമ്പാട്ടുകാവ് മെട്രോ യാഡിനു സമീപം സജിതാലയത്തില്‍ രാധാകൃഷ്ണനെ ആണു പോലീസിന്റെ സാന്നിധ്യത്തില്‍ രക്ഷപ്പെടുത്തി ജനറല്‍ ആശുപത്രിയിലാക്കിയത്. രാധാകൃഷ്ണന്‍ സുഖപ്പെടുന്ന മുറയ്ക്കു മൊഴിയെടുത്ത് ഉത്തരവാദികള്‍ക്കെതിരെ കേസെടുക്കുമെന്നു പോലീസ് പറഞ്ഞു.
ഏലൂരില്‍ സ്വകാര്യ വ്യവസായ സ്ഥാപനത്തില്‍ തൊഴിലാളിയായിരുന്നു രാധാകൃഷ്ണന്‍. ജോലിക്കിടെ അപകടത്തില്‍ കാലിനു പരുക്കേറ്റു വീട്ടില്‍ കിടപ്പായി. ഇപ്പോള്‍ എഴുന്നേറ്റു നടക്കാം. എന്നാല്‍, കാലിലെ വ്രണവും പഴുപ്പും ഗുരുതരാവസ്ഥയിലാണ്. ഭാര്യയും മകളും ഉണ്ടെങ്കിലും ഏറെക്കാലമായി അവരുമായി ബന്ധമില്ല. ഒറ്റയ്ക്കാണു കഴിഞ്ഞിരുന്നത്. രണ്ടാഴ്ചയിലൊരിക്കല്‍ ബന്ധുക്കള്‍ റോഡില്‍ നിന്ന് അകത്തേക്കു വലിച്ചെറിയുന്ന പൊറോട്ടയും മറ്റുമായിരുന്നു ഏക ഭക്ഷണം. ഇടക്കാലത്ത് അതും മുടങ്ങി.
പിന്നീട് അയല്‍ക്കാരുടെ തണലിലായി ജീവിതം. വിശപ്പും കാലിലെ വേദനയും സഹിക്കാനാവാതെ ഇന്നലെ ഗേറ്റിനു മുന്നില്‍ വന്നു കരഞ്ഞപ്പോഴാണു നാട്ടുകാര്‍ പഞ്ചായത്തിലും ആരോഗ്യ വകുപ്പിലും അറിയിച്ചത്. പഞ്ചായത്ത് പ്രസിഡന്റ് രാജി സന്തോഷ്, സ്ഥിരം സമിതി അധ്യക്ഷന്‍ മുഹമ്മദ് ഷെഫീക്, വാര്‍ഡ് അംഗം റംല അലിയാര്‍ തുടങ്ങിയവരാണു സഹായവുമായി എത്തിയത്.
