പത്തനംതിട്ട : പോലീസ് അന്വേഷണങ്ങള്ക്കായി ആരും തൊടാന് മടിക്കുന്ന അഴുകിയ മൃതദേഹങ്ങള് എടുത്ത് നല്കുന്ന തിരുവല്ല സ്വദേശി സോമന് കാലില് അണുബാധയെ തുടര്ന്ന് ചികിത്സയില്. പോലീസിനായി മൃതദേഹം എടുക്കുന്നതിനിടെയാണ് സോമന് കാലില് മുറിവേല്ക്കുകയും അണുബാധയുണ്ടാവുകയും ചെയ്തത്. ഇലന്തൂര് നരബലി കേസില് അടക്കം പോലീസ് അന്വേഷണത്തിന് സോമന്റെ സഹായം നിര്ണ്ണായകമായിരുന്നു. ജില്ലയില് കണ്ടെത്തിയ അഴുകിയതും പുഴുവരിച്ചതുമായ ആറായിരത്തില് അധികം മൃതദേഹങ്ങളാണ് സോമന് പോലീസിനായി എടുത്ത് നല്കിയത്.
ജൂണ് 2 ന് പത്തനംതിട്ട ചന്ദനപ്പള്ളയില് മുള്ളുകള്ക്കിടയില് കണ്ടെത്തിയ 22 ദിവസം പഴക്കമുള്ള മൃതദേഹം എടുക്കുന്നതിനിടെ സോമന്റെ കാലില് മുറിവേല്ക്കുകയും തുടര്ന്ന് അണുബാധയുണ്ടാവുകയുമായിരുന്നു. ഇദ്ദേഹം ധരിച്ചിരുന്ന പി.പി.ഇ കിറ്റ് കീറി കാലിന്റെ തുട ഭാഗത്ത് തറച്ച മുള്ളില് നിന്നുണ്ടായ മുറിവിലാണ് അണുബാധയുണ്ടായത്. ഇതേ ദിവസം തന്നെ ഇദ്ദേഹത്തിന് പനി ആരംഭിക്കുകയും ചെയ്തു. ഉടന് തന്നെ ചികിത്സക്കായി ആശുപത്രിയില് പ്രവേശിപ്പിച്ചു എങ്കിലും മൃതദേഹത്തില് നിന്നുണ്ടായ അണുബാധയാണ് കാരണമെന്ന് തിരിച്ചറിയാന് ഒരു മാസമെടുത്തു. ഇതിനിടെ നാല് തവണ കാലില് ശസ്ത്രക്രിയ നടത്തി. മൂന്ന് ദിവസം തീവ്ര പരിചരണ വിഭാഗത്തിലും കഴിഞ്ഞു. തിരുവല്ലയിലെ സ്വകാര്യ ആശുപത്രിയിലാണ് സോമന് ചികിത്സയിലുള്ളത്.
സോമന്റെ ദുരവസ്ഥ അറിഞ്ഞ് പോലീസ് ഒന്നേകാല് ലക്ഷം രൂപ നല്കി സഹായിച്ചു. മറ്റുപലരും നല്കിയ സഹായത്താലാണ് ശസ്ത്രക്രിയ പൂര്ത്തിയാക്കിയത്. സുമനസുകളുടെ സഹായം ഉണ്ടെങ്കില് മാത്രമേ ചികിത്സ പൂര്ത്തിയാക്കാന് സാധിക്കുകയുള്ളൂ. പത്തനംതിട്ട, ആലപ്പുഴ, കോട്ടയം, തിരുവനന്തപുരം വരെയുള്ള വിവിധ ജില്ലകളില് അഴുകിയ മൃതദേഹങ്ങള് എടുത്ത് നല്കുവാന് സോമന് പോലീസിനെ സഹായിച്ചിട്ടുണ്ട്.
