റാന്നി: നാറാണംമുഴി ഗ്രാമപഞ്ചായത്ത് പ്രസിഡന്റായി കോണ്ഗ്രസിലെ സോണിയ മനോജ് തിരഞ്ഞെടുക്കപ്പെട്ടു. മുന് ഗ്രാമപഞ്ചായത്ത് പ്രസിഡന്റ് ബീനാ ജോബി രാജി വെച്ച ഒഴിവിലാണ് തിരഞ്ഞെടുപ്പു നടന്നത്. സോണിയയ്ക്ക് പത്ത് വോട്ടും എല്.ഡി.എഫില് നിന്നു മത്സരിച്ച സന്ധ്യാ അനിലിന് മൂന്നു വോട്ടും ലഭിച്ചു. ബീനാ ജോബി സോണിയ മനോജിന്റെ പേരു നിര്ദേശിക്കുകയും ആനിയമ്മ അച്ചന്കുഞ്ഞ് പിന്താങ്ങുകയും ചെയ്തു. പതിമൂന്ന് അംഗങ്ങള് ഉള്ള നാറാണംമുഴി പഞ്ചായത്തില് പത്ത് പേരുടെ പിന്തുണയോടു കൂടെയാണു സോണിയ തിരഞ്ഞെടുക്കപ്പെട്ടത്.
കോണ്ഗ്രസ്സ് പാര്ട്ടിയുടെ മുന് ധാരണ പ്രകാരം, കഴിഞ്ഞ മാസം മുന് പ്രസിഡന്റ് ബീനാ ജോബി രാജി വെച്ചതിനെ തുടര്ന്നാണു നാറാണംമുഴിയില് പ്രസിഡന്റ് തിരഞ്ഞെടുപ്പ് നടന്നത്. സന്ധ്യാ അനിലിന്റെ പേര് സുനില് ചെല്ലപ്പന് നിര്ദേശിക്കുകയും റെനി പിന്താങ്ങുകയും ചെയ്തു. പഞ്ചായത്തിലെ ഏഴാം വാര്ഡായ പൂപ്പള്ളിയില് നിന്നുള്ള അംഗമാണ് സോണിയ. പരേതനായ മനോജ് തോണിക്കടവിലാണ് ഭര്ത്താവ്. മക്കള് നിയ സൂസ്സന് മനോജ്, നെവിന് മനോജ്.