തിരുവനന്തപുരം: ചൂട് കൂടിവരുന്ന സാഹചര്യത്തില് മാര്ഗനിര്ദേശങ്ങള് പുറത്തിറക്കി വനിത ശിശുവികസന വകുപ്പ്. വേനല്ക്കാലത്ത് കുഞ്ഞുങ്ങളെ പ്രത്യേകം കരുതണമെന്ന് മന്ത്രി വീണ ജോര്ജ് അറിയിച്ചു. അങ്കണവാടികളും ഡേകെയര് സെന്ററുകളും പ്രത്യേകം ശ്രദ്ധിക്കണം. ചൂട് വര്ധിച്ചു വരുന്നതിനാല് കുട്ടികള്ക്ക് നിര്ജലീകരണം ഉണ്ടാകാതെ നോക്കണം. കുട്ടികള്ക്ക് ധാരാളം വെള്ളം കൊടുക്കണം. എല്ലാ അങ്കണവാടികളും മാര്ഗനിര്ദേശങ്ങള് കൃത്യമായി പാലിക്കണമെന്നും മന്ത്രി നിര്ദ്ദേശിച്ചു.
ഫാന് സൗകര്യമില്ലാത്ത അങ്കണവാടികളില് തദ്ദേശസ്വയംഭരണ സ്ഥാപനങ്ങളുടെ സഹായത്തോടെ അവ ലഭ്യമാക്കുന്നതിന് ശിശുവികസന ഓഫീസര്മാര് നടപടി സ്വീകരിക്കേണ്ടതാണ്. കഴിവതും ഇളംനിറമുള്ള അയവുള്ള കോട്ടണ് വസ്ത്രങ്ങള് ധരിപ്പിച്ച് കുട്ടികളെ അങ്കണവാടിയില് എത്തിക്കുന്നതിന് രക്ഷിതാക്കളോട് നിര്ദ്ദേശിക്കേണ്ടതാണ്. പുറത്തിറങ്ങുമ്പോള് കുട, വെള്ള കോട്ടന് തൊപ്പി മുതലായവ ഉപയോഗിക്കുന്നതിന് നിര്ദ്ദേശിക്കണം. ചെരുപ്പ് ഇടാതെ നടക്കരുതെന്ന് കുട്ടികളോട് നിര്ദേശിക്കുക.