തിരുവനന്തപുരം : കേരള മന്ത്രിസഭയിലെ വകുപ്പ് വിഭജനത്തിൽ നിർണ്ണായക തീരുമാനങ്ങൾ പുറത്തുവരുന്നു. മന്ത്രി എ.പി. അനിൽകുമാറിന് നിലവിലുള്ള വൈദ്യുതി വകുപ്പിന് പുറമേ സ്പോർട്സ്, പാർലമെന്ററി കാര്യ വകുപ്പുകൾ കൂടി നൽകാൻ തീരുമാനമായി. അതേസമയം, മുസ്ലിം ലീഗിന് ഉന്നത വിദ്യാഭ്യാസ വകുപ്പിന് പകരമായി ഫിഷറീസ് വകുപ്പ് നൽകാനാണ് കോൺഗ്രസ് നേതൃത്വത്തിലും മുഖ്യമന്ത്രി തലത്തിലും ധാരണയായിരിക്കുന്നത്. സീനിയർ നേതാവായ തനിക്ക് താരതമ്യേന പ്രാധാന്യം കുറഞ്ഞ വകുപ്പുകൾ നൽകുന്നതിൽ എ.പി. അനിൽകുമാറിനും അദ്ദേഹത്തെ അനുകൂലിക്കുന്നവർക്കും ശക്തമായ അതൃപ്തിയുണ്ട്.
2004-2006 കാലത്തെ ഉമ്മൻചാണ്ടി സർക്കാരിലും 2011-2016 കാലത്തും മന്ത്രിയായിരുന്ന അനിൽകുമാറിന് ഇത്തവണ പ്രധാനപ്പെട്ട വകുപ്പുകൾ ലഭിച്ചില്ലെന്ന പരാതി നിലനിൽക്കുന്നു. ഇപ്പോൾ ലഭിച്ച സ്പോർട്സ്, പാർലമെന്ററി കാര്യ വകുപ്പുകൾ ചെറിയ വകുപ്പുകളാണെന്നാണ് അദ്ദേഹത്തോടൊപ്പം ഉള്ളവരുടെ വിലയിരുത്തൽ. മുസ്ലിം ലീഗിന് ഫിഷറീസ് വകുപ്പ് വിട്ടുകൊടുക്കുന്നതിൽ കോൺഗ്രസിനകത്തുതന്നെ ശക്തമായ എതിർപ്പുണ്ട്. ഇതിനുപുറമേ, ലത്തീൻ കത്തോലിക്കാ സഭയും ഈ തീരുമാനത്തിൽ വലിയ ആശങ്കയും പ്രതിഷേധവും അറിയിച്ചിട്ടുണ്ട്. വിഷയം പരിഹരിക്കാനായി മുഖ്യമന്ത്രി നേരിട്ട് സഭാ ആസ്ഥാനത്തെത്തി ചർച്ചകൾ നടത്തിയെങ്കിലും ഇതുവരെ പ്രശ്നപരിഹാരമായിട്ടില്ല എന്നാണ് റിപ്പോർട്ടുകൾ സൂചിപ്പിക്കുന്നത്.
