അഹമ്മദാബാദ് : ദേശീയ ഗെയിംസില് ആദ്യമായി ജൂഡോയില് കേരളത്തിന് രണ്ട് സ്വര്ണം. വനിതകളുടെ 78 കിലോയില് താഴെയുള്ളവരുടെ വിഭാഗത്തില് പി ആര് അശ്വതിയും 90 കിലോയില് താഴെയുള്ളവരുടെ വിഭാഗത്തില് എ ആര് അര്ജുനുമാണ് ചരിത്രമെഴുതിയത്. ഹരിയാനയുടെ വിക്രമിനെ അര്ജുന് കീഴടക്കി. ഉത്തര്പ്രദേശിന്റെ തരുണയെയാണ് അശ്വതി തോല്പ്പിച്ചത്.
ആദ്യമായാണ് കേരളതാരങ്ങള് ഫൈനലില് പ്രവേശിച്ചത്. 2015 ഗെയിംസില് കേരളത്തിന് അഞ്ച് വെങ്കലമെഡല് കിട്ടിയിരുന്നു. ഇതായിരുന്നു മികച്ച നേട്ടം. അശ്വതിക്ക് 2015ല് വെങ്കലമുണ്ടായിരുന്നു. ഇരുവരും തൃശൂരിലാണ് പരിശീലനം നടത്തുന്നത്. പുരുഷ ഫുട്ബോള് ഫൈനലില് കടന്നതോടെ മെഡല് ഉറപ്പായി. ഇതോടെ കേരളത്തിന്റെ മെഡല്നേട്ടം 17 സ്വര്ണവും 16 വെള്ളിയും 13 വെങ്കലവുമടക്കം 46 മെഡലുകളായി.
നിലവിലെ ജേതാക്കളായ സര്വീസസ് മറ്റു ടീമുകളെ ബഹുദൂരം പിന്നിലാക്കി മുന്നേറ്റം തുടരുന്നു. 51 സ്വര്ണം, 33 വെള്ളി, 29 വെങ്കലം എന്നിങ്ങനെയാണ് സര്വീസസിന്റെ നേട്ടം. ഹരിയാന (31, 29, 35) രണ്ടാമതും മഹാരാഷ്ട്ര (29, 32, 56) മൂന്നാമതുമാണ്. കഴിഞ്ഞ തവണ നാട്ടില് നടന്ന ഗെയിംസില് കേരളം റണ്ണറപ്പായിരുന്നു. 54 സ്വര്ണമടക്കം 162 മെഡലുകളാണ് നേടിയത്. ഇക്കുറി നേട്ടം മൂന്നിലൊന്നായി കുറഞ്ഞു. അത്ല–റ്റിക്സിലാണ് സമാനതകളില്ലാത്ത തിരിച്ചടി. ഗെയിംസിന്റെ സമാപനച്ചടങ്ങുകള് 12ന് സൂറത്തില് നടക്കും.
