മാവേലിക്കര : ഡിവൈഎഫ്ഐ ചെട്ടികുളങ്ങര കിഴക്ക് മേഖലാ സെക്രട്ടറി ഈരേഴ തെക്ക് മനമേല് കുറ്റിയില് ഗോകുലിനെ ആര്എസ്എസ് ക്രിമിനലുകള് കുത്തിയ സംഭവത്തില് മൂന്ന് പേരെ കായംകുളം പോലീസ് കസ്റ്റഡിയിലെടുത്തു. ശനി വൈകിട്ട് ആറിന് ചെട്ടികുളങ്ങര ഈരേഴ തെക്ക് കുരങ്ങ് ഗേറ്റ് ജങ്ഷനിലാണ് സംഭവം. കാറ്ററിങ് ജോലിക്കാരനായ ഗോകുല് ജോലി കഴിഞ്ഞ് വനിതാ ജോലിക്കാരുമായി കാറില് മടങ്ങുംവഴി രണ്ട് ബൈക്കുകളിലെത്തിയ നാലുപേരാണ് കാര് തടഞ്ഞുനിര്ത്തിയതെന്ന് ഗോകുല് പറഞ്ഞു.
ആര്എസ്എസ് പ്രവര്ത്തകരായ തുഷാര്, വിഷ്ണു, അഖില് (ചുണ്ടന്) എന്നിവരും കണ്ടാല് അറിയാവുന്ന ഒരാളുമാണ് ആക്രമിച്ചതെന്നും ഗോകുല് പറഞ്ഞു. സംഭവത്തില് പ്രതിഷേധിച്ച് മാവേലിക്കര ബ്ലോക്ക് കമ്മിറ്റി ചെട്ടികുളങ്ങര ക്ഷേത്ര ജങ്ഷനില് സംഘടിപ്പിച്ച പ്രതിഷേധ പ്രകടനവും യോഗവും ജില്ലാ പ്രസിഡന്റ് ജെയിംസ് ശാമുവേല് ഉദ്ഘാടനം ചെയ്തു. ശാന്തിഷ് ജൂണ് അധ്യക്ഷനായി. അനുപമ, സെന്സോമന്, ആദര്ശ്, സുനീഷ്, അനന്തു, മണികണ്ഠന് എന്നിവര് സംസാരിച്ചു. ജി വിഷ്ണു സ്വാഗതം പറഞ്ഞു.
