തിരുവനന്തപുരം: ക്ഷേത്രപരിസരത്ത് ആള്ക്കൂട്ട അഭ്യാസങ്ങളും ആയുധ പ്രയോഗങ്ങളും തടയുന്നത് കര്ശനമായി പാലിക്കണമെന്ന് ഹൈക്കോടതി. തിരുവിതാംകൂര് ദേവസ്വം കമ്മീഷണര്ക്കും ശാര്ക്കര ദേവീക്ഷേത്രം അഡ്മിനിസ്ട്രേറ്റീവ് ഓഫീസര്ക്കും ഇത് സംബന്ധിച്ച് നിര്ദേശം നല്കി. തിരുവനന്തപുരത്തെ ശ്രീ ശാര്ക്കര ദേവി ക്ഷേത്രം ആര്എസ്എസ് പ്രവര്ത്തകര് അഭ്യാസത്തിനും ആയുധ പരിശീലനത്തിനും വേണ്ടി അനധികൃതമായി കൈയേറിയെന്നാരോപിച്ചുള്ള ഹര്ജിയിലാണ് കോടതി നിര്ദേശം.
ആയുധകായിക പരിശീലനങ്ങള് ഭക്തര്ക്കും ക്ഷേത്രദര്ശനത്തിനെത്തുന്ന തീര്ഥാടകര്ക്കും പ്രത്യേകിച്ച് സ്ത്രീകള്ക്കും കുട്ടികള്ക്കും ബുദ്ധിമുട്ട് ഉണ്ടാക്കുന്നതായി ചൂണ്ടിക്കാട്ടി ക്ഷേത്രത്തിലെ സമീപവാസികള് സമര്പ്പിച്ച ഹര്ജിയിലാണ് നടപടി. ബന്ധപ്പെട്ട അധികാരികളുടെ അനുമതിയില്ലാതെയാണ് പ്രതികള് ക്ഷേത്രത്തില് നിയമവിരുദ്ധ പ്രവര്ത്തനങ്ങള് നടത്തുന്നതെന്ന് ഹര്ജിക്കാര് കോടതിയെ അറിയിച്ചിരുന്നു. ക്ഷേത്രപരിസരത്ത് പുകയില ഉത്പന്നങ്ങള് ഉപയോഗിക്കുന്നുണ്ടെന്നും അതിനാല് വൃത്തിയെയും വിശുദ്ധിയെയും ദൈവികതയെയും ബാധിക്കുമന്നും ഹര്ജിക്കാര് ആരോപിച്ചു. മാസ് ഡ്രില്/ ആയുധ പരിശീലനത്തിന്റെ ഭാഗമായി ഉച്ചത്തില് മുദ്രാവാക്യം വിളിക്കുമെന്നും അതുവഴി ക്ഷേത്രത്തിന്റെ സമാധാനപരവും ശാന്തവുമായ അന്തരീക്ഷം തകര്ക്കുമെന്നും ഹര്ജിക്കാര് ആരോപിച്ചു.
