പത്തനംതിട്ട : ശ്രീകൃഷ്ണ ജയന്തി ആഘോഷങ്ങളുടെ ഭാഗമായി ഉണ്ണിക്കണ്ണന്മാരായും ഗോപികമാരായും അണിഞ്ഞൊരുങ്ങിയ നിരവധി കുരുന്നുകളാണ് ജില്ലയുടെ വിവിധ സ്ഥലങ്ങളില് നടന്ന ശോഭായാത്രകളില് പങ്കെടുത്തത്. പ്രധാന നഗരങ്ങളിലും ഗ്രാമങ്ങളിലും വിപുലമായ ഒരുക്കങ്ങളോടെയാണ് ആഘോഷങ്ങള് നടന്നത്. കുട്ടികളോടൊപ്പം മുതിര്ന്നവരും ശോഭായാത്രകളുടെ ഭാഗമായി. കൃഷ്ണനും ഗോപികമാരും നഗര വീഥികളില് അണിനിരന്നതോടെ നാടും നഗരവും അമ്പാടിയായി മാറി. ബാലഗോകുലത്തിന്റെ നേതൃത്വത്തിലാണ് ശോഭായാത്രകള് നടന്നത്. കൃഷ്ണനും രുഗ്മിണിയും രാധയും വിവിധ കലാ രൂപങ്ങളും വാദ്യമേളങ്ങളും എല്ലാം ശോഭായാത്രയ്ക്ക് മിഴിവേകി. വിവിധ സ്ഥലങ്ങളില് നിന്ന് എത്തിയ ശോഭാ യാത്രകള് ഒന്നിച്ച് കേന്ദ്രീകരിച്ച് മഹാശോഭായാത്രകളാവുകയായിരുന്നു.
കുട്ടികള്ക്കായി ഉറിയടി മത്സരങ്ങളും നടന്നു. വൈകിട്ട് മൂന്ന് മണിയോടെ ശോഭായാത്രകള് ആരംഭിച്ചിരുന്നു. നിരവധി ആളുകളാണ് പരിപാടികള് കാണുവാന് കാത്തുനിന്നത്. ജില്ലയിലെ കോന്നി, അടൂര്, തിരുവല്ല, പത്തനംതിട്ട, ആറന്മുള എന്നിവിടങ്ങളിലാണ് കൂടുതലും ആളുകള് പങ്കെടുത്തത്. ശോഭായാത്രകളുടെ ഭാഗമായി പോലീസും ബന്ധപ്പെട്ട വകുപ്പുകളും കഴിഞ്ഞ ദിവസങ്ങളില് തന്നെ മുന്നൊരുക്കങ്ങള് തുടങ്ങിയിരുന്നു. കര്ശനമായ സുരക്ഷാ ക്രമീകരണങ്ങളോടെയാണ് പരിപാടികള് നടന്നത്. വിവിധ ഇടങ്ങളില് ഗതാഗത ക്രമീകരണങ്ങളും ഏര്പ്പെടുത്തിയിരുന്നു.
