കൊച്ചി : ശ്രീറാം വെങ്കിട്ടരാമന് സപ്ലൈക്കോയില് ചുമതലയേറ്റു. സപ്ലൈകോയില് ജനറല് മാനേജരായിട്ടാണ് നിയമനം. മാദ്ധ്യമപ്രവര്ത്തകന് കെഎം ബഷീറിനെ വാഹനമിടിച്ച് കൊലപ്പെടുത്തിയ കേസിലെ പ്രതിയായ ശ്രീറാമിനെ കളക്ടര് സ്ഥാനത്ത് നിന്നും മാറ്റണമെന്നാവശ്യപ്പെട്ട് വിവിധ സംഘടനകള് നടത്തിയ കടുത്ത പ്രതിഷേധത്തിനൊടുവിലാണ് സര്ക്കാര് ആലപ്പുഴ കളക്ടര് സ്ഥാനത്ത് നിന്ന് മാറ്റിയത്.
ശ്രീറാം വെങ്കിട്ടരാമന്റെ നിയമനം ആലപ്പുഴ ജില്ലയ്ക്ക് തന്നെ അപമാനമാണെന്നും കൊലക്കേസ് പ്രതിയെ ജില്ലാ കളക്ടറായി നിയമിച്ച സര്ക്കാര് തീരുമാനം ജനങ്ങളോടുള്ള വെല്ലുവിളിയാണെന്നും മുസ്ലീം ലീഗ് ജില്ലാ അദ്ധ്യക്ഷന് എ.എം നസീര് ആരോപിച്ചിരുന്നു. മജിസ്റ്റീരിയല് അധികാരമുള്ള ജില്ലാ കളക്ടര് പദവിയിലേക്ക് കളങ്കിതനായ വ്യക്തിയെ നിയമിക്കുന്നത് ദൂരവ്യാപകമായ പ്രത്യാഘാതം സൃഷ്ടിക്കുമെന്നും അദ്ദേഹം പറഞ്ഞിരുന്നു.
