തിരുവനന്തപുരം : എസ്എസ്എല്സി പരീക്ഷാ ഫലം ജൂണ് 15 ബുധനാഴ്ച പ്രഖ്യാപിക്കും. ജൂണ് 20ന് പ്ലസ് ടു അല്ലെങ്കില് ഹയര് സെക്കന്ഡറി പരീക്ഷ (എച്ച്എസ്ഇ), വൊക്കേഷണല് ഹയര് സെക്കന്ഡറി പരീക്ഷ (വിഎച്ച്എസ്ഇ) പരീക്ഷാഫലങ്ങളുമെത്തും. ജൂണ് 10ന് എസ്എസ്എല്സി പരീക്ഷാ ഫലം പ്രഖ്യാപിക്കുമെന്ന് ബോര്ഡ് ഉദ്യോഗസ്ഥന് അറിയിച്ചതായി റിപ്പോര്ട്ടുകളുണ്ടായിരുന്നു. എന്നാല് എസ്എസ്എല്സി ഫലം ജൂണ് 15നും പ്ലസ് ടു ഫലം 20നും പ്രഖ്യാപിക്കുമെന്ന് വിദ്യാഭ്യാസ മന്ത്രി വി ശിവന്കുട്ടി നേരത്തെ പ്രഖ്യാപിച്ചിരുന്നു. പരീക്ഷാഫലം പ്രഖ്യാപിച്ചുകഴിഞ്ഞാല് വിദ്യാര്ത്ഥികള്ക്ക് ഔദ്യോഗിക വെബ്സൈറ്റുകളായ keralaresults.nic.in, dhsekerala.gov.in എന്നിവയില് പരിശോധിക്കാം.
റോള് നമ്പറും ജനനത്തീയതിയും ഉപയോഗിച്ച് എസ്എസ്എല്സി, എച്ച്എസ്ഇ ഫലങ്ങള് പരിശോധിക്കാം. സ്ക്രീനില് ദൃശ്യമാകുന്ന എസ്എസ്എല്സി, ഡിഎച്ച്എസ്ഇ പ്ലസ് ടു പരീക്ഷാ ഫലങ്ങള് കൂടുതല് റഫറന്സുകള്ക്കായി ഡൗണ്ലോഡ് ചെയ്ത് പ്രിന്റ് ഔട്ട് എടുക്കുകാനുള്ള സൗകര്യവുമുണ്ട്. kerala.gov.in, keralaresults.nic.in, results.itschool.gov.in, cdit.org, prd.kerala.gov.in, results.nic.in, educationkerala.gov.in, examresults.net/kerala എന്നീ വെബ്സെെറ്റുകളിലും ഫലം ലഭ്യമാകും.
ഈ വര്ഷം 2022 മാര്ച്ച് 31 നും ഏപ്രില് 29 നും ഇടയില് നടത്തിയ SSLC പരീക്ഷയില് 4.26 ലക്ഷം വിദ്യാര്ത്ഥികളാണ് ഹാജരായത്. മാര്ച്ച് 30 മുതല് ഏപ്രില് 22 വരെ നടന്ന പ്ലസ് ടു പരീക്ഷയില് നാല് ലക്ഷം വിദ്യാര്ത്ഥികളും പരീക്ഷയെഴുതി. കഴിഞ്ഞ വര്ഷം എസ്എസ്എല്സി പരീക്ഷയില് 99.47 ശതമാനമായിരുന്നു വിജയശതമാനം. എച്ച്എസ്ഇ പരീക്ഷയില് 87.94 ശതമാനം വിദ്യാര്ഥികളും വിജയിച്ചു.
