ചെന്നൈ : രാജ്ഭവനില് മൂന്ന് ജീവനക്കാര്ക്ക് കൂടി കൊവിഡ് പോസിറ്റീവ് സ്ഥിരീകരിച്ചതിനാല് തമിഴ്നാട് ഗവര്ണര് ബന്വാരിലാല് പുരോഹിത് ക്വാറന്റൈനില് പ്രവേശിച്ചു. മുന്കരുതലിന്റെ ഭാഗമായി ഡോക്ടറുടെ നിര്ദേശപ്രകാരം ഒരാഴ്ച ക്വാറന്റൈനില് പോകാന് ഗവര്ണര് തീരുമാനിക്കുകയായിരുന്നു. അദ്ദേഹത്തിന്റെ ആരോഗ്യനില തൃപ്തികരമാണെന്ന് രാജ്ഭവന് അധികൃതര് അറിയിച്ചു.
ചെന്നൈയില് കൊവിഡ് വ്യാപനം രൂക്ഷമായ പശ്ചാത്തലത്തില് മുന്കരുതലെന്നോണം കഴിഞ്ഞാഴ്ച രാജ്ഭവനില് 38 ജീവനക്കാര്ക്ക് പരിശോധന നടത്തിയിരുന്നു. ഇതില് മൂന്ന് പേര്ക്ക് രോഗം സ്ഥിരീകരിക്കുകയും ഇവരെ ആശുപത്രിയിലേയ്ക്ക് മാറ്റുകയും ചെയ്തിരുന്നു. ഇതിന് പുറമേ മൂന്ന് പേര്ക്ക് കൂടി രോഗം കണ്ടെത്തിയ പശ്ചാത്തലത്തിലാണ് നിരീക്ഷണത്തില് പോകാന് ഗവര്ണര് തീരുമാനിച്ചത്.
