തിരുവനന്തപുരം : നവംബറില് ചവറ, കുട്ടനാട് മണ്ഡലങ്ങളിലേക്ക് നടക്കുന്ന ഉപതെരഞ്ഞെടുപ്പ് ഒഴിവാക്കാന് സര്ക്കാര് ശ്രമം. ഇക്കാര്യം തെരഞ്ഞെടുപ്പ് കമ്മീഷനോട് ആവശ്യപ്പെടാനാണ് തീരുമാനം. വിഷയത്തില് പ്രതിപക്ഷത്തിന്റെ പിന്തുണ ഉറപ്പിക്കാന് മുഖ്യമന്ത്രി പിണറായി വിജയന് പ്രതിപക്ഷ നേതാവ് രമേശ് ചെന്നിത്തലയെ വിളിച്ചു. കോവിഡ് രോഗവ്യാപനം വര്ധിക്കുന്ന സാഹചര്യത്തില് ഉപതെരഞ്ഞെടുപ്പ് നടത്തുന്നത് ശരിയല്ലെന്നാണ് സര്ക്കാര് നിലപാട്.
നിയമസഭയുടെ കാലാവധി കഴിയാന് മാസങ്ങള് മാത്രമാണ് ബാക്കിയുള്ളത് എന്നതാണ് ഭരണ-പ്രതിപക്ഷ കക്ഷികളെ ഇത്തരമൊരു ആവശ്യത്തിലേക്ക് നയിക്കുന്നത്. പ്രതിപക്ഷവും സര്ക്കാരിന്റെ ആവശ്യത്തോട് അനുകൂലിക്കുന്നണ്ടെങ്കിലും തദ്ദേശ തെരഞ്ഞെടുപ്പും മാറ്റിവെയ്ക്കണമെന്നാണ് യുഡിഎഫ് നിലപാട്.
സംസ്ഥാനത്ത് കോവിഡ് സാഹചര്യം അതീവ ഗുരുതരമാണന്ന് ചൂണ്ടിക്കാട്ടി തദ്ദേശ തെരഞ്ഞെടുപ്പ് നീട്ടണമെന്ന് ആവശ്യപ്പെട്ട് ഹൈക്കോടതിയില് ഹര്ജി. പഞ്ചായത്തില് പല പ്രദേശങ്ങളും ഹോട്ട്സ്പോട്ടായി പ്രഖ്യാപിച്ചിരിക്കുകയാണന്നും നിയന്ത്രണങ്ങള് മൂലം വോട്ടര് പട്ടികയില് പേരു ചേര്ക്കാനോ ഫലപ്രദമായ തെളിവെടുപ്പിനോ കഴിയുന്നില്ലെന്നും വ്യക്തമാക്കി മുഹമ്മദ് റാഫി എന്ന വ്യക്തിയാണ് കോടതിയെ സമീപിച്ചത്.
എന്നാല് തെരഞ്ഞെടുപ്പ് തീയതി തീരുമാനിച്ചിട്ടില്ലെന്ന് തെരഞ്ഞെടുപ്പ് കമ്മീഷന് ഹൈക്കോടതിയെ അറിയിച്ചു. ആരോഗ്യ- തദ്ദേശ വകുപ്പുകളുമായി പ്രാരംഭ ചര്ച്ചകള് നടത്തിയതായും കമ്മീഷന് കോടതിയില് വ്യക്തമാക്കി. കോവിഡ് സാഹചര്യം കണക്കിലെടുത്ത് തെരഞ്ഞെടുപ്പ് നീട്ടണമെന്നാവശ്യപ്പെട്ട് സമര്പ്പിച്ച ഹര്ജിയിലാണ് കമ്മിഷന് നിലപാട് അറിയിച്ചത്.
