തിരുവനന്തപുരം : സംസ്ഥാനത്തെ പൊതുവിദ്യാലയങ്ങൾ പുതിയ അധ്യയന വർഷത്തിനായി തുറക്കുന്നതിന്റെ ഭാഗമായുള്ള സംസ്ഥാനതല പ്രവേശനോത്സവം ജൂൺ ഒന്നിന് നടക്കും. തിരുവനന്തപുരം ഗവൺമെന്റ് മോഡൽ ജി.എച്ച്.എസ്.എസിലാണ് ഇത്തവണത്തെ സംസ്ഥാനതല ഉദ്ഘാടനം നിശ്ചയിച്ചിരിക്കുന്നത്. മുഖ്യമന്ത്രി വി.ഡി. സതീശൻ പരിപാടിയുടെ സംസ്ഥാനതല ഉദ്ഘാടനം നിർവഹിക്കുമെന്ന് പൊതുവിദ്യാഭ്യാസ ഡയറക്ടർ അറിയിച്ചു. ജൂൺ ഒന്നിന് തന്നെ സംസ്ഥാനത്തെ എല്ലാ പൊതുവിദ്യാലയങ്ങളിലും പ്രവേശനോത്സവം സംഘടിപ്പിക്കണമെന്നാണ് വിദ്യാഭ്യാസ വകുപ്പിന്റെ നിർദ്ദേശം.
സംസ്ഥാനതല പരിപാടിക്ക് പുറമെ ജില്ലാതലത്തിലും പഞ്ചായത്ത്, ബ്ലോക്ക് തലങ്ങളിലും വിപുലമായ രീതിയിൽ പ്രവേശനോത്സവം നടത്തും. ഇത്തവണത്തെ പ്രവേശനോത്സവത്തിനായി പ്രത്യേക പ്രവേശനോത്സവ ഗാനം തയ്യാറാക്കിയിട്ടുണ്ടെന്നും ഇത് എല്ലാ സ്കൂളുകളിലേക്കും അയച്ചുനൽകുമെന്നും അധികൃതർ വ്യക്തമാക്കി. കുട്ടികളെ പങ്കെടുപ്പിച്ചുകൊണ്ടുള്ള ഘോഷയാത്രകൾ പാടില്ലെന്ന് കർശന നിർദ്ദേശമുണ്ട്. ജനപ്രതിനിധികളും രാഷ്ട്രീയ നേതാക്കളും പങ്കെടുക്കുന്ന പരിപാടികളിൽ കുട്ടികളെ മടുപ്പിക്കുന്ന രീതിയിലുള്ള ദീർഘമായ പ്രസംഗങ്ങൾ ഒഴിവാക്കണം. കുട്ടികൾക്ക് താൽപ്പര്യമുള്ള പരിപാടികൾക്കാണ് മുൻഗണന നൽകേണ്ടത് എന്നും. പരിപാടികൾ നടത്തുമ്പോൾ ഹരിത ചട്ടം പൂർണ്ണമായും പാലിച്ചിരിക്കണം എന്നും നിർദേശം നൽകിയിട്ടുണ്ട്.
