തിരുവനന്തപുരം: സംസ്ഥാന പോലീസ് തലപ്പത്ത് അഴിച്ചുപണി. ഉന്നത ഉദ്യോഗസ്ഥര്ക്കടക്കം സ്ഥാനക്കയറ്റവും പുതിയ നിയമനവും നല്കിയാണ് അഴിച്ചുപണി. ഐ.ജിമാരായിരുന്ന വിജയ് സാഖറെ, എസ്. ശ്രീജിത്ത് എന്നിവര് എ.ഡി.ജി.പിമാരായി.
ഡി.ജി.പി ആര്. ശ്രീലേഖ വിരമിച്ച ഒഴിവില് എ.ഡി.ജി.പി സുദേഷ് കുമാര് ഡി.ജി.പി റാങ്കോടെ വിജിലന്സ് ഡയറക്ടറായി തുടരും. ക്രമസമാധാന ചുമതലയുള്ള എ.ഡി.ജി.പി ആയി വിജയ് സാഖറെയെ നിയമിച്ചു. ഷെയ്ഖ് ദര്വേഷ് സാഹിബിനെ നീക്കിയശേഷമാണ് സാഖറെയെ നിയമിച്ചത്. ഷെയ്ഖ് ദര്വേഷ് സാഹിബിന് ട്രെയിനിങ്ങിന്റെയും കേരള പൊലീസ് അക്കാദമിയുടെയും ചുമതല നല്കി.
എസ്. ശ്രീജിത്താണ് പുതിയ ക്രൈംബ്രാഞ്ച് മേധാവി. ബി. സന്ധ്യ ഫയര്ഫോഴ്സ് മേധാവിയാകും. യോഗേഷ് ഗുപ്തയെ ബെവ്കോ എം.ഡിയായി നിയമിച്ചു. എ.ഡി.ജി.പി അനില്കാന്ത് റോഡ് സേഫ്റ്റി കമ്മീഷണറാകും. ജി. സ്പര്ജന് കുമാര് ക്രൈം ബ്രാഞ്ച് ഐ.ജിയാകും. നാഗരാജുവാണ് പുതിയ കൊച്ചി സിറ്റി പൊലീസ് കമ്മീഷണര്. എ. അക്ബര് തൃശ്ശൂര് റേഞ്ച് ഡി.ഐ.ജിയും സുജിത് ദാസ് പാലക്കാട് എസ്.പിയുമാകും.
കൊല്ലം റൂറല് എസ്.പിയായി കെ ബി രവിയേയും പത്തനംതിട്ട എസ്.പിയായി രാജീവ് പി.ബിയെയും നിയമിച്ചു. യതീഷ് ചന്ദ്രയെ കണ്ണൂര് എസ്.പി സ്ഥാനത്ത് നിന്ന് മാറ്റി കെ.എ.പി നാലാം ബറ്റാലിയന് കമാന്ഡന്റായി നിയമിച്ചു. കണ്ണൂരില് റൂറല് എസ്.പിക്ക് പുറമെ കമ്മീഷണര് തസ്തികയും രൂപീകരിച്ചു. ആര്. ഇളങ്കോ ആണ് പുതിയ കണ്ണൂര് കമ്മീഷണര്.
