കൊല്ലം: സംസ്ഥാന സ്കൂള് കലോത്സവത്തില് ആവേശ പോരാട്ടം. സ്കൂള് കലോത്സവത്തിന്റെ ആദ്യദിനം പൂര്ത്തിയായപ്പോള് ആവേശകരമായ പോരാട്ടമാണ് നടക്കുന്നത്. പോയിന്റ് നിലയില് തൃശ്ശൂരും കോഴിക്കോടും ഒപ്പത്തിനൊപ്പമാണ്. കണ്ണൂരാണ് രണ്ടാം സ്ഥാനത്ത് ഉള്ളത്. കലോത്സവത്തിന്റെ രണ്ടാം ദിനമായ ഇന്ന് ജനപ്രിയ ഇനങ്ങള് വേദിയിലെത്തും. ഹൈസ്കൂൾ വിഭാഗം ഒപ്പനയും നാടോടിനൃത്തവും വേദിയിൽ എത്തും. ആദ്യദിനത്തില് തന്നെ കലോത്സവത്തില് വലിയ ജനപങ്കാളിത്തമാണുണ്ടായത്. രണ്ടാം ദിനമായ ഇന്ന് ജനപ്രിയ ഇനങ്ങള് വേദിയിലെത്തുന്നതോടെ പോരാട്ടം കൂടുതല് കനക്കുമെന്നുറപ്പാണ്.
ഇതോടൊപ്പം ജനപങ്കാളിത്തവും ഏറും. കലോത്സവ നഗരിയില് വിദ്യാര്ത്ഥികള്ക്കായി വിപുലമായ സൗകര്യങ്ങളാണ് ഒരുക്കിയിരിക്കുന്നത്. കൊല്ലം ആശ്രാമം മൈതാനത്താണ് പ്രധാന വേദി. കാര്യമായ പരാതികളില്ലാതെയാണ് ആദ്യദിനം പൂര്ത്തിയായത്. ഇന്ന് 60 ഇനങ്ങളാണ് വേദിയിൽ എത്തുക.
