ലഖ്നൗ: ലോക്സഭാ തിരഞ്ഞെടുപ്പിൽ കോൺഗ്രസുമായുള്ള സീറ്റ് വിഭജന ചർച്ച സമാജ്വാദി പാർട്ടി (എസ്പി) അവസാനിപ്പിച്ചതായി റിപ്പോർട്ടുകൾ. അഖിലേഷ് യാദവിൻ്റെ നേതൃത്വത്തിലുള്ള സമാജ്വാദി പാർട്ടി തിരഞ്ഞെടുപ്പിൽ 17 സീറ്റുകൾ വാഗ്ദാനം ചെയ്തതിന് ശേഷം കോൺഗ്രസിനോട് തീരുമാനം വ്യക്തമാക്കാൻ ആവശ്യപ്പെട്ടതായി ദേശീയ മാധ്യമങ്ങൾ റിപ്പോർട്ട് ചെയ്തു. ചർച്ചകൾ പലതവണ നടന്നു. പല പട്ടികകളും കൈമാറി. സീറ്റ് വിഭജനത്തിന്റെ കാര്യത്തിൽ തീരുമാനമായശേഷം ന്യായ് യാത്രയിൽ സമാജ്വാദി പാർട്ടി പങ്കെടുക്കും’മെന്നായിരുന്നു അദ്ദേഹം മാധ്യമങ്ങളോട് പറഞ്ഞിരുന്നത്. മണിക്കൂറുകൾക്ക് ശേഷം 11 സ്ഥാനാർത്ഥികളുടെ പട്ടികയും എസ്പി പുറത്തിറക്കിയിരുന്നു.
ഉത്തർപ്രദേശിൽ ഒരു കാലത്ത് ആധിപത്യം പുലർത്തിയിരുന്ന കോൺഗ്രസ് അതിജീവനത്തിനായി പോരാടുന്ന സ്ഥിതിയാണ് നിലവിലുള്ളത്. സഖ്യം യാഥാർത്ഥ്യമായില്ലെങ്കിൽ പശ്ചിമ ബംഗാളിന് ശേഷം കോൺഗ്രസ് നേരിടുന്ന രണ്ടാമത്തെ വലിയ തിരിച്ചടിയാകുമിത്. പശ്ചിമ ബംഗാളിൽ ഒറ്റയ്ക്ക് 42 സീറ്റുകളിൽ മത്സരിക്കുമെന്ന് തൃണമൂൽ കോൺഗ്രസ് അധ്യക്ഷ മമത ബാനർജി പ്രഖ്യാപിച്ചിരുന്നു.
