കൊച്ചി : പത്താം ക്ലാസ് പരീക്ഷാഫലം വൈകിയതിന്റെ പേരില് സി.ബി.എസ്.ഇ സിലബസില് പഠിക്കുന്ന വിദ്യാര്ഥികള്ക്ക് ഹയര് സെക്കന്ഡറി സംസ്ഥാന സിലബസിലേക്ക് മാറാനുള്ള അവസരം നിഷേധിക്കാനാവില്ലെന്ന് ഹൈക്കോടതി. ഒന്നോ രണ്ടോ ദിവസത്തേക്ക്, സിബിഎസ്ഇ പത്താം ക്ലാസ് ഫലം വൈകുന്നത് ഒരു തടസ്സമാകരുത്. സിബിഎസ്ഇ പത്താം ക്ലാസ് ഫലം ഉടന് പ്രഖ്യാപിക്കും. അതിനാല് ഹര്ജി വെള്ളിയാഴ്ച വൈകിട്ട് മൂന്ന് മണിക്ക് കൂടുതല് വാദം കേള്ക്കുന്നതിനായി മാറ്റി.
അതുവരെ പ്ലസ് വണ് പ്രവേശനത്തിന് അപേക്ഷ നല്കാമെന്നും ജസ്റ്റിസ് വി.രാജ വിജയരാഘവന്റെ ഇടക്കാല ഉത്തരവില് പറയുന്നു. അപേക്ഷ സമര്പ്പിക്കാനുള്ള തീയതി നീട്ടണമെന്നാവശ്യപ്പെട്ട് വിദ്യാര്ത്ഥികളും മലപ്പുറം സ്വദേശികളുമായ അമീന് സലിം, മുഹമ്മദ് സിനാന് എന്നിവരാണ് ഹൈക്കോടതിയെ സമീപിച്ചത്. സപ്ലിമെന്ററി അലോട്ട്മെന്റില് സിബിഎസ്ഇ വിദ്യാര്ത്ഥികള്ക്ക് അവസരം നല്കാമെന്ന നിലപാടാണ് സര്ക്കാര് സ്വീകരിച്ചത്. എന്നാല് 2017 ല് സമാനമായ സാഹചര്യത്തില് ഹൈക്കോടതി ഡിവിഷന് ബെഞ്ച് പുറപ്പെടുവിച്ച ഉത്തരവാണ് സിംഗിള് ബെഞ്ച് ചൂണ്ടിക്കാണിച്ചത്. സിബിഎസ്ഇ വിദ്യാര്ത്ഥികള്ക്ക് 10 ശതമാനം സീറ്റുകള് നീക്കിവെക്കാമെന്ന സര്ക്കാര് നിലപാട് ഡിവിഷന് ബെഞ്ച് നേരത്തെ തള്ളിയിരുന്നു.
