കണ്ണൂര് : ഇ ബുള് ജെറ്റ് വ്ലോഗര്മാര് സഹോദരങ്ങളുടെ ട്രാവലറിന്റെ രജിസ്ട്രേഷന് റദ്ദാക്കുന്നതിനുള്ള നടപടികള് ആരംഭിച്ചു. ഇരിട്ടി ആര്ടിഒ ഇതു സംബന്ധിച്ച നോട്ടീസ് നല്കി. അങ്ങാടിക്കടവിലുള്ള ഇ ബുള് ജെറ്റ് സഹോദരങ്ങളുടെ വീട്ടിലാണ് നോട്ടീസ് പതിച്ചത്. കേസില് വ്ലോഗര്മാര്മാരായ ലിബിനും എബിനും ഇന്നലെ ജാമ്യം ലഭിച്ചിരുന്നു. അപകടരമായ രീതിയില് വാഹനം ഓടിച്ചതിനും റോഡ് നിയമങ്ങള് പാലിക്കാത്തതിനുമാണ് ട്രാവലറിന്റെ രജിസ്ട്രേഷന് റദ്ദാക്കുന്നത്. പ്രതികളുടെ ലൈസന്സ് റദ്ദാക്കാനും ഗതാഗത കമ്മീഷണര് ശിപാര്ശ ചെയ്തിട്ടുണ്ട്.
പൊതുമുതല് നശിപ്പിച്ചതുള്പ്പെടെ പത്തിലധികം വകുപ്പുകള് ചുമത്തിയാണ് ഇവരെ പോലീസ് അറസ്റ്റ് ചെയ്തിരുന്നത്. വാഹനം അനുമതിയില്ലാതെ രൂപമാറ്റം നടത്തിയതിന് പോലീസ് ചുമത്തിയ 42,000 രൂപ പിഴയൊടുക്കാന് വിസമ്മതിച്ച ലിബിനും എബിനും ബഹളം വെക്കുകയും ആര് ടി ഒ ഓഫീസിന് മുന്നിലെത്തി പ്രതിഷേധിക്കുകയുമായിരുന്നു. ഇവര്ക്ക് പുറമെ ഇ ബുള് ജെറ്റിന്റെ ഫോളോവേഴ്സായ 17 പേര്ക്കെതിരെ കൊവിഡ് ചട്ടം ലംഘിച്ചതിന് കേസെടുത്തിട്ടുണ്ട്. സമൂഹ മാധ്യമങ്ങളിലൂടെ കലാപ ആഹ്വാനം നടത്തിയതിന് കൊല്ലത്തും ആലപ്പുഴയിലും രണ്ടുപേര്ക്കെതിരെയും കേസുണ്ട്. യൂട്യൂബര്മാരുടെ ഇതുവരെയുള്ള എല്ലാ വീഡിയോയും വിശദമായി പരിശോധിക്കുമെന്നും നിയമലംഘനം നടത്താന് ആളുകളോട് ആഹ്വാനം ചെയ്തിട്ടുണ്ടെങ്കില് കര്ശന നടപടിയുണ്ടാകുമെന്നും പൊലീസ് അറിയിച്ചിട്ടുണ്ട്.
