പത്തനാപുരം: തലവൂര് അലക്കുഴിയില് പേപ്പട്ടിയുടെ ആക്രമണത്തില് ആറ് പേര്ക്ക് പരിക്കേറ്റു. അലക്കുഴി ജംഗ്ഷനിലെ കടകളിലിരുന്നവരെ ഓടിച്ചിട്ട് കടിച്ച പേപ്പട്ടി വീട്ടുമുറ്റത്ത് നിന്നവരെയും ആക്രമിച്ചു. അലക്കുഴി മൈലാടുംകുഴി വീട്ടില് നാഥന് (53), കിഴക്കേ അറ്റത്ത് വീട്ടില് ബാലന് (65), സിമി ഭവനില് ജോര്ജ് കുട്ടി (62), ജിബിന് ഭവനില് ജിജോ (38), പള്ളിക്കല് സ്വദേശിനി സൗമ്യ, ആനക്കോട്ടൂര് സ്വദേശിനി ലാവണ്യ എന്നിവര്ക്കാണ് പേപ്പട്ടിയുടെ കടിയേറ്റത്.
പേപ്പട്ടിയുടെ ആക്രമണത്തില് ജോര്ജ് കുട്ടിയുടെ കാലില് ആഴത്തിലുള്ള മുറിവുണ്ട്. നാഥന്റെ മുഖത്തും മൂക്കിനുമാണ് കടിയേറ്റത്. പ്രദേശത്ത് കുറച്ച് നാള് മുന്പും പേപ്പട്ടിയുടെ ആക്രമണത്തില് ധാരാളം വളര്ത്തുമൃഗങ്ങള്ക്ക് കടിയേറ്റിരുന്നു. രണ്ടാഴ്ച്ച മുന്പ് പത്തനാപുരം ജംഗ്ഷനിലും കടയ്ക്കാമണ്ണിലുമായി 20ല് അധികം പേര്ക്ക് പേപ്പട്ടിയുടെ അക്രമണത്തില് കടിയേറ്റിരുന്നു. മേഖലയില് പേപ്പട്ടി ശല്യം രൂക്ഷമായതോടെ ഭീതിയിലാണ് പ്രദേശവാസികള്.
