റാന്നി : സന്ധ്യകഴിഞ്ഞാല് റാന്നി താലൂക്ക് ആശുപത്രി റോഡില് ഇരുട്ടില് തപ്പേണ്ട അവസ്ഥയെന്ന് പരാതി. മുണ്ടപ്പുഴ റോഡില് നിന്നും താലൂക്കാശുപത്രിയിലേക്കുള്ള റോഡിലലെ തെരുവു വിളക്കുകളാണ് തെളിയാതായത്. ഇതുമൂലം കാല്നടയായും മറ്റും എത്തുന്നവര് ഇരുട്ടില് തപ്പുകയാണ്. രാത്രിയില് എത്തുന്ന രോഗികള്ക്കായി മരുന്നുവാങ്ങുന്നതിനും വിവിധ പരിശോധനകള്ക്കും മറ്റുമായി കൂട്ടിരിപ്പുകാര്ക്ക് പുറത്തു പോകേണ്ട ആവശ്യമുണ്ട്. ഇക്കൂട്ടര് അതുവഴിയെത്തുന്ന വാഹനങ്ങളുടെ വെളിച്ചത്തിലാണ് സഞ്ചരിക്കുന്നത്.
പാര്ക്കിംങ് ഗ്രൗണ്ടിലും സന്ധ്യകഴിഞ്ഞാല് പിന്നെ വെളിച്ചമില്ല. ഇവിടെ വാഹനങ്ങള് നിര്ത്തിയിട്ടു സാമൂഹ്യ വിരുദ്ധര് മദ്യപാനം നടത്തുന്നതായും ആരോപണമുണ്ട്. നിലാവ് പദ്ധതിയില് എല്ലായിടത്തും തെരുവു വിളക്കുകള് സ്ഥാപിച്ചിട്ടുണ്ടെങ്കിലും പ്രധാന സ്ഥലമായ ആശുപത്രി റോഡ് ഇരുളിലാണ്ടിട്ടും ആരും തിരിഞ്ഞു നോക്കുന്നില്ല. അടിയന്തരമായി വെളിച്ചം എത്തിക്കുവാന് ബന്ധപ്പെട്ടവര് ശ്രമിക്കണമെന്നാണ് നാട്ടുകാരുടെ ആവശ്യം.
