കുമളി: ശുശ്രൂഷിക്കാന് ആളില്ലാതെ മരിച്ച അന്നക്കുട്ടിയുടെ മകനെതിരേ നടപടിയെടുത്ത് കേരള ബാങ്ക്. കുമളി പ്രധാന ശാഖയിലെ കളക്ഷന് ഏജന്റായ എം.എം.സജിമോനെ ജോലിയില്നിന്ന് സസ്പെന്ഡുചെയ്തു.
മകനെന്ന നിലയിലുള്ള ഉത്തരവാദിത്വത്തില് സജിമോന് വീഴ്ചവരുത്തിയതുമായി ബന്ധപ്പെട്ട് കുമളി പോലീസ് എഫ്.ഐ.ആര്. രജിസ്റ്റര് ചെയ്തതിന്റെ അടിസ്ഥാനത്തിലാണ് നടപടിയെന്ന് കേരള ബാങ്ക് പ്രസിഡന്റ് വ്യക്തമാക്കി.
സംഭവത്തില്, മകള് സിജിയെ പഞ്ചായത്ത് ജോലിയില്നിന്ന് നേരത്തേ പിരിച്ചുവിട്ടിരുന്നു. മക്കള് ഉപേക്ഷിച്ചതിനെത്തുടര്ന്ന് കുമളി അട്ടപ്പള്ളം ലക്ഷംവീട് കോളനിയിലെ വാടകവീട്ടില് കഴിഞ്ഞിരുന്ന മൈലയ്ക്കല് അന്നക്കുട്ടി മാത്യു ജനുവരി 20-നാണ് കോട്ടയം മെഡിക്കല് കോളേജ് ആശുപത്രിയില് ചികിത്സയിലിരിക്കെ മരിച്ചത്.
