കോന്നി : കഴിഞ്ഞദിവസമുണ്ടായ ശക്തമായ കാറ്റിലും മഴയിലും കോന്നിയുടെ വിവിധയിടങ്ങളിൽ വ്യാപകമായ നാശനഷ്ടം. വൈദ്യുതി തൂണുകൾ ഒടിഞ്ഞതിനെ തുടർന്ന് കെഎസ്ഇബിക്കും ലക്ഷങ്ങളുടെ നഷ്ടം ഉണ്ടായി. അരുവാപ്പുലം ഗ്രാമപഞ്ചായത്തിലെ കൊക്കാത്തോട്ടിൽ താന്നിമൂട്ടിൽ റോയി ഈപ്പൻ, മഹാരാജ് എന്നിവരുടെ വീടിനു മുകളിൽ മരം കടപുഴകി വീണ് ഭാഗികമായ നാശനഷ്ടം ഉണ്ടായി. അരുവാപ്പുലം പഞ്ചായത്തിലെ മുറ്റാക്കുഴി കിഴക്കേക്കര വീട്ടിൽ സരസമ്മ എന്നയാളുടെ വീടിനു മുകളിലേക്ക് മരം ഒടിഞ്ഞുവീണ് ഭാഗികമായ നാശനഷ്ടം ഉണ്ടായി. പ്രമാടം ഗ്രാമപഞ്ചായത്തിലെ തെങ്ങും കാവ് മാവേലിൽ രാജു, മണി, വെട്ടൂർ മുറി വല്യ മണ്ണിൽ വീട്ടിൽ ലില്ലിക്കുട്ടി ശാമുവേല്, ഇളകൊള്ളൂർ മുണ്ടക്കാമുരുപ്പ് പടിഞ്ഞാറേ ചരുവിൽ വീട്ടിൽ അജു മേരി, മുറ്റാക്കുഴി കിഴക്കേക്കര സരസമ്മ, പുളിഞ്ചാണി പുഷ്പവിലാസം പുഷ്പ എന്നിവരുടെ വീടിന് മുകളിൽ മരം വീണ് സരമായ നാശനഷ്ടമുണ്ടായി.
കഴിഞ്ഞ ദിവസം രാത്രി 12 മണിക്ക് ശേഷമുണ്ടായ ശക്തമായ കാറ്റിൽ കെ എസ് ഇ ബി കോന്നി സെക്ഷൻ പരിധിയിൽ ഇലക്ട്രിക് പോസ്റ്റുകൾ തകർന്നു. 30 ലക്ഷം രൂപയുടെ നഷ്ടം കണക്കാക്കുന്നു.40 ൽ ആധികം പോസ്റ്റുകൾ ആണ് പൂർണ്ണമായും ഭാഗികമായും തകർന്നത്. തേക്കുതോട്, തണ്ണിത്തോട്, കരിമാൻതോട്, ഞക്കുകാവ്, ഇളകൊള്ളൂർ, പൊന്തനാംകുഴി, വെള്ളപ്പാറ, മരങ്ങാട്ട് മുക്ക്, വെട്ടൂർ, അട്ടച്ചാക്കൽ എന്നിവിടങ്ങളിൽ ആണ് ഇലക്ട്രിക് പോസ്റ്റുകൾ ഒടിഞ്ഞു വീണ് കെ എസ് ഇ ബിക്ക് ലക്ഷങ്ങളുടെ നഷ്ടം ഉണ്ടായത്. ഇപ്പോഴും വൈദ്യുതിബന്ധം പുനസ്ഥാപിക്കാനുള്ള ജോലികൾ പുരോഗമിക്കുന്നതായി കെ എസ് ഇ ബി അറിയിച്ചു.
