റാഞ്ചി: ജാര്ഖണ്ഡ് പബ്ലിക് സര്വീസ് കമ്മീഷന് അംഗങ്ങളുടെ രാജി സ്വീകരിച്ച് ഗവര്ണര് സന്തോഷ് കുമാര് ഗാംഗ്വാര്. അജിത ഭട്ടാചാര്യ, അനിമ ഹന്സ്ഡ, ജമാല് അഹമ്മദ് എന്നിവരുടെ രാജിയാണ് സ്വീകരിച്ചത്. വിദ്യാര്ഥി പ്രതിഷേധം കനത്തതോടെയാണ് മൂവരും രാജിവെച്ചത്. പ്രതിഷേധത്തെ തുടര്ന്ന് വിദ്യാര്ഥികളുമായി സര്ക്കാര് നടത്തിയ മൂന്നാംഘട്ട ചര്ച്ച പരാജയപ്പെടുകയും ചെയ്തു. പരീക്ഷാ ക്രമക്കേടുകളില് സിബിഐ അന്വേഷണം വേണമെന്ന വിദ്യാര്ഥികളുടെ ആവശ്യം സര്ക്കാര് അംഗീകരിച്ചില്ല.ഇതോടെ നാളെ നിയമസഭയിലേക്ക് മാര്ച്ച് നടത്തുമെന്ന് പ്രതിഷേധക്കാരായ വിദ്യാര്ഥികള് പറഞ്ഞു വിദ്യാര്ഥികള്ക്ക് പിന്തുണയുമായി സിജെപി സ്ഥാപകന് അഭിജീത് ദീപ്കെയും രംഗത്തുണ്ട്.
അതേസമയം പരീക്ഷാ ക്രമക്കേടുകളുമായി ബന്ധപ്പെട്ട സിഐഡി അന്വേഷണം 90 ദിവസത്തിനകം പൂര്ത്തിയാക്കുമെന്ന് സര്ക്കാര് അറിയിച്ചു.റിട്ട. ജഡ്ജിയുടെ നേതൃത്വത്തിലായിരിക്കും സിഐഡി അന്വേഷണം. വിദ്യാര്ഥികളുടെ താത്പര്യങ്ങള് സംരക്ഷിക്കുമെന്ന് മുഖ്യമന്ത്രി ഹേമന്ത് സോറന് പറഞ്ഞു. പരീക്ഷാ ക്രമക്കേടുകള്ക്കെതിരെ കടുത്ത നടപടി സ്വീകരിക്കുമെന്ന് മന്ത്രി സുവിദ്യ കുമാറും പ്രതികരിച്ചു. കേസുകള് പരിഗണിക്കാന് അതിവേഗ കോടതി സ്ഥാപിക്കും. പ്രതികള്ക്കെതിരെ 90 ദിവസത്തിനുള്ളില് കുറ്റപത്രം സമര്പ്പിക്കും. പരീക്ഷകളുടെ നടത്തിപ്പില് പരിഷ്കാരങ്ങള് കൊണ്ടുവരുമെന്നും സുവിദ്യ കുമാര് പറഞ്ഞു.
