പാലക്കാട്: കല്പ്പാത്തിപ്പുഴയില് കുളിക്കുന്നതിനിടെ കാണാതായ വിദ്യാര്ഥിക്കായി തിരച്ചില് തുടരുന്നു. സ്കൂബ ഡൈവിങ് സംഘത്തിന്റെ നേതൃത്വത്തില് തിരച്ചില് തുടര്ന്നെങ്കിലും കണ്ടെത്താനായില്ല. രണ്ടാംദിവസത്തെ തിരച്ചില് വ്യാഴം വൈകീട്ട് നിര്ത്തി. ബുധന് വൈകീട്ട് അഞ്ചോടെയാണ് ഗോവിന്ദരാജപുരം തടയണയുടെ താഴെ കോയമ്ബത്തുര് തുടിയല്ലൂര് സ്വദേശി ഉദയശങ്കറിന്റെ മകന് കെല്ഷാവിന് ഒഴുക്കില്പ്പെട്ടത്. തുടിയല്ലൂര് സ്കൂളില് പത്താംക്ലാസ് വിദ്യാര്ഥിയാണ്.
ചികിത്സയിലിരിക്കുന്ന കുന്നുംപുറത്തെ ബന്ധുവിനെ സന്ദര്ശിക്കാനാണ് ഉദയശങ്കറും മക്കളായ കെന്ഷാവിനും അനുജന് ടോണിയും കല്പ്പാത്തിയിലെത്തിയത്. അച്ഛനും ചെറിയച്ഛനും അനിയനുമൊപ്പം പുഴയില് കുളിക്കാനിറങ്ങിയപ്പോഴായിരുന്നു അപകടം. വൈകീട്ട് വീട്ടിലേക്ക് മടങ്ങാനിരുന്നതാണെങ്കിലും ചെറിയച്ഛന് വിനോദ്കുമാറിനൊപ്പം കെന്ഷാവിനും ടോണിയും കുളിക്കാന് പുഴയിലേക്ക് പോയി. വിനോദ് കുമാറും ടോണിയും കുളി കഴിഞ്ഞ് കടവില്നിന്ന് കയറാനിരിക്കെ പുഴയിലേക്കിറങ്ങിയ കെന്ഷാവിന് ഒഴുക്കില്പ്പെടുകയായിരുന്നുവെന്ന് ടൗണ് നോര്ത്ത് പോലീസ് പറഞ്ഞു.
രക്ഷിക്കാന് വിനോദ് കുമാര് വെള്ളത്തിലേക്ക് ചാടിയെങ്കിലും കുത്തൊഴുക്കുമൂലം രക്ഷിക്കാനായില്ല. മരക്കൊമ്പില് തടഞ്ഞ് രക്ഷപ്പെടാനാകാതെ കുടുങ്ങിയ വിനോദ്കുമാറിനെ നാട്ടുകാരാണ് കരയ്ക്കെത്തിച്ചത്. പ്രതികൂല കാലവസ്ഥയും ശക്തമായ ഒഴുക്കും ബുധനാഴ്ച രക്ഷാപ്രവര്ത്തനത്തിന് തടസ്സമായി. വെള്ളിയാഴ്ചയും തിരച്ചില് തുടരുമെന്ന് അഗ്നിരക്ഷാസേന പാലക്കാട് സ്റ്റേഷന് ഓഫീസര് ജോബി ജേക്കബ് പറഞ്ഞു.
