ന്യൂഡല്ഹി : കിഴക്കന് ഡല്ഹിയിലെ സ്കൂളില് പരീക്ഷ കഴിഞ്ഞിറങ്ങിയ നാല് പത്താംക്ലാസ് വിദ്യാര്ഥികളെ പിന്തുടര്ന്ന് മര്ദിച്ചശേഷം കുത്തിപരിക്കേല്പ്പിച്ചു. സ്കൂളിന് പുറത്താണ് സംഭവം. ഗുരുതരമായി പരിക്കേറ്റ നാലു വിദ്യാര്ഥികളെയും ആശുപത്രിയില് പ്രവേശിപ്പിച്ചതായി പോലീസ് അറിയിച്ചു. കിഴക്കന് ഡല്ഹിയിലെ മയൂര് വിഹാര് പ്രദേശത്തെ സര്വോദയ ബാല് വിദ്യാലയ സ്കൂളിന് പുറത്താണ് സംഭവം. പത്താം ക്ലാസ് പരീക്ഷ കഴിഞ്ഞ് പുറത്തിറങ്ങിയതാണ് നാലു വിദ്യാര്ഥികളും. ഇതോടെ പ്രദേശത്തെ തന്നെ മറ്റു സ്കൂളുകളിലെ വിദ്യാര്ഥികള് ഇവരെ പിന്തുടരുകയും ആക്രമിച്ചശേഷം കുത്തിപരിക്കേല്പ്പിക്കുകയുമായിരുന്നു.
സ്കൂളിന് പുറത്ത് നിരവധി കുട്ടികള് തടിച്ചുകൂടിയിരുന്നു. സ്വയരക്ഷക്കായി നിരവധി കുട്ടികള് പാര്ക്കിലേക്കും സ്കൂളിലേക്കും ഓടിക്കയറി. എന്നാല് നാലു വിദ്യാര്ഥികളെ ഇവര് കുത്തിപരിക്കേല്പ്പിക്കുകയായിരുന്നു. ഗൗതം, റെഹാന്, ഫൈസാന്, ആയുഷ് എന്നിവര്ക്കാണ് പരിക്കേറ്റത്. 15 – 16 വയസ് പ്രായമുള്ളവരാണ് നാലുപേരും. ഇതില് മൂന്നുപേര് ലാല് ബഹദൂര് ശാസ്ത്രി ആശുപത്രിയില് ചികിത്സ തേടിയശേഷം വീട്ടിലേക്ക് മടങ്ങി. ഒരാള് ഡല്ഹി എയിംസില് ചികിത്സയിലാണെന്നും പോലീസ് പറഞ്ഞു. സംഭവത്തിന്റെ സി.സി.ടി.വി ദൃശ്യങ്ങള് പരിശോധിക്കുകയാണെന്നും പ്രാഥമിക അന്വേഷണത്തില് മറ്റു സ്കൂളുകളിലെ വിദ്യാര്ഥികളാണ് ആക്രമണം നടത്തിയതെന്ന് തിരിച്ചറിഞ്ഞതായും പോലീസ് കൂട്ടിച്ചേര്ത്തു.
