കൊച്ചി: 1995ല് കോണ്ഗ്രസ് നേതാവ് കെ സുധാകരന് പിണറായി വിജയന്, കോടിയേരി ബാലകൃഷ്ണന്, ഇപി ജയരാജന് എന്നിവരെ വധിക്കാന് ഗൂഢാലോചന നടത്തിയെന്ന് പോലീസ് ഹൈക്കോടതിയില്. ഇപി ജയരാജനെ വധിക്കാന് ഗൂഢാലോചന നടത്തിയെന്ന കേസ് റദ്ദാക്കണമെന്ന് ആവശ്യപ്പെട്ട് സുധാകരന് നല്കിയ ഹര്ജിയിലാണ് പോലീസ് റിപ്പോര്ട്ട് നല്കിയത്.
രാഷ്ട്രീയ വൈരാഗ്യത്തിന്റെ പേരില് മൂന്നു സിപിഎം നേതാക്കള്ക്കും എതിരെ സുധാകരന് മറ്റുള്ളവരുമായി ചേര്ന്ന് ഗൂഢാലോചന നടത്തിയെന്ന് പോലീസ് റിപ്പോര്ട്ടില് പറയുന്നു. ജയരാജന് നല്കിയ പരാതിയുടെ അടിസ്ഥാനത്തില് തമ്പാനൂര് പോലീസ് ആണ് കേസ് രജിസ്റ്റര് ചെയ്തത്. പിണറായിയെയും കോടിയേരിയെയും സാക്ഷികളായാണ് ഉള്പ്പെടുത്തിയത്. ഇന്നലെ ഹര്ജി പരിഗണനയ്ക്കു വന്നപ്പോള് കുറ്റപത്രത്തിലെ വിശദാംശങ്ങള് ഗവ. പ്ലീഡര് എസ് യു നാസര് കോടതിയില് വിവരിച്ചു. ഡിസിസി പ്രസിഡന്റും കണ്ണൂര് എംഎല്എയും ആയിരുന്ന സുധാകരനും തലശ്ശേരിയിലെ രാജീവനും രാഷ്ട്രീയ വൈരാഗ്യത്തിന്റെ പേരില് മൂന്നു സിപിഎം നേതാക്കളെയും ഇല്ലായ്മ ചെയ്യാന് ശ്രമിച്ചെന്നാണ് കുറ്റപത്രത്തില് പറയുന്നത്.
