കോട്ടയം : വിഷം കഴിച്ച ശേഷം മണിമലയാറ്റില് ചാടി ജീവനൊടുക്കാന് ശ്രമിച്ച പെണ്കുട്ടികളെ രക്ഷപെടുത്തി. മുണ്ടക്കയം വെള്ളനാടി വള്ളക്കടവ് പാലത്തില് നിന്ന് ആറ്റില് ചാടിയ കോരുത്തോട് മടുക്ക സ്വദേശിനികളായ രണ്ടു പെണ്കുട്ടികളെയാണ് രക്ഷപെടുത്തിയത്. തിങ്കളാഴ്ച ഉച്ചകഴിഞ്ഞ് രണ്ടരയോടെയാണ് സംഭവം. പെണ്കുട്ടികള് ആറ്റില് ചാടുന്നത് കണ്ട് സ്ഥലത്തെത്തിയ എസ്റ്റേറ്റിലെ ട്രാക്ടര് ഡ്രൈവറായ ചെറുവള്ളിയില് മുരളി സമീപത്തുണ്ടായിരുന്ന കൈതകൃഷി തൊഴിലാളികളുടെയും പ്രദേശവാസികളുടെയും സഹായത്തോടെ കുട്ടികളെ രക്ഷപെടുത്തുകയായിരുന്നു.
തുടര്ന്ന് മുണ്ടക്കയം പോലീസെത്തി വിദ്യാര്ഥികളെ കാഞ്ഞിരപ്പള്ളി ജനറല് ആശുപത്രിയിലും പിന്നീട് കോട്ടയം മെഡിക്കല് കോളജിലും പ്രവേശിപ്പിച്ചു. അതേസമയം ഫോണില് ഫോട്ടോയെടുത്തതിന് മാതാപിതാക്കള് വഴക്കു പറഞ്ഞതില് മനംനൊന്താണ് പെണ്കുട്ടികള് ജീവനൊടുക്കാന് ശ്രമിച്ചതെന്നാണ് പ്രാഥമിക വിവരം. പാലത്തില് നിന്ന് ചാടുന്നതിനു മുമ്പ് ഇരുവരും വിഷം കഴിച്ചിരുന്നതായി പോലീസ് സ്ഥിരീകരിച്ചു. സംഭവത്തില് വിശദമായ അന്വേഷണം നടത്തുമെന്നും പോലീസ് അറിയിച്ചു.
