ഒമാൻ : സുൽത്താൻ ഹൈതം ബിൻ താരിഖിന്റെ ഒമാൻ വിഷൻ 2040 അനുസരിച്ചുള്ള ദർശന പദ്ധതി യാഥാർഥ്യമാകാൻ ഇനി അധികനാളില്ല. സുൽത്താൻ ഹൈതം സിറ്റി, സീബ് വിലായത്തിലെ മബേലയിൽ ഉയരാൻ പോകുന്ന പുതിയ നഗരം. വൈവിധ്യമാർന്ന ശൈലിയിലുള്ള 20,000 പാർപ്പിട യൂണിറ്റുകളിൽ ഒരു ലക്ഷം പേർക്ക് താമസ സൗകര്യമൊരുക്കുന്ന ഹൈതം സിറ്റി ഒമാന്റെ ഭാവി മാറ്റിമറിക്കുമെന്ന് ഉറപ്പാണ്. 1.48 കോടി ചതുരശ്ര മീറ്റർ വിസ്തൃതിയിലാണ് നഗരം നിർമിക്കുന്നത്. ഇതിൽ ഏകദേശം 29 ലക്ഷം ചതുരശ്ര മീറ്റർ പ്രദേശവും ഹരിതഭംഗിക്ക് പ്രാധാന്യം കൊടുത്തുകൊണ്ടായിരിക്കും. ‘ഭാവിയിലെ നിധി’ എന്ന പേരിൽ ഉയരാനിരിക്കുന്ന ഈ നഗരപദ്ധതി ഒട്ടേറെ പ്രത്യേകതയോടെയും പുതുമയോടെയുമാണ് യാഥാർഥ്യമാവുക.
ഒമാനി സാംസ്കാരിക പൈതൃകത്തെ ഉയർത്തിക്കാണിക്കുകയും അതോടൊപ്പം സുസ്ഥിര ജീവിതശൈലികളെ ചേർത്തുനിർത്തുകയും ചെയ്യുന്ന തരത്തിലാണ് നിർമ്മാണം. അതോടൊപ്പം വിസ്മയകരമായ വാസ്തുവിദ്യയും ഉൾപ്പെടുത്തും. ഒമാനി പൗരന്മാർക്ക് വിവിധ ശ്രേണികളിലുള്ള പാർപ്പിട സൗകര്യങ്ങൾ ഉണ്ടാക്കുന്നതിനോടൊപ്പം വിദേശികളടക്കം ഇവിടെ നിക്ഷേപത്തിനുള്ള അവസരങ്ങളും ലഭിക്കും. അതിനായി അതി നൂതനമായ സൗകര്യങ്ങളാണ് ഒരുക്കിയെടുക്കുന്നത്.
വിശാലമായ വാഹനപാർക്കിങ് കേന്ദ്രങ്ങൾ, കളിസ്ഥലങ്ങൾ, പാർക്കുകൾ, ആധുനിക സൗകര്യങ്ങളോടെയുള്ള 39 സർക്കാർ, സ്വകാര്യ സ്കൂളുകൾ, 20,000 രോഗികൾക്ക് ചികിത്സ ലഭ്യമാക്കുന്ന രണ്ട് ഹെൽത്ത് സെന്ററുകളും, 10,000 രോഗികൾക്ക് സേവനം നൽകുന്ന ആറ് ഹെൽത്ത് സെന്ററുകളും ഉൾപ്പെടെ 11 ആരോഗ്യ സേവന കേന്ദ്രങ്ങൾ, 1,200 കിടക്കകളുള്ള റഫറൽ ആശുപത്രി, ഒരു സ്വകാര്യ ആശുപത്രി, നിശ്ചയദാർഢ്യമുള്ളവർക്കും പ്രായമായവർക്കും സേവനം നൽകുന്ന പ്രത്യേക കേന്ദ്രം എന്നിവയെല്ലാം ഈ നഗരത്തിൽ ഉണ്ടാകും.
