പത്തനംതിട്ട : സാമൂഹിക പ്രവർത്തക ഡോ.എം എസ് സുനിൽ ഭവനരഹിതരായ നിരാലംബർക്ക് പണിതു നൽകുന്ന 375-ാമത് സ്നേഹഭവനം ബിജി മാണിയുടെയും നിഷ മാണിയുടെയും സഹായത്താൽ പ്രകാശ് സിറ്റിയിൽ പ്ലാന്തോട്ടത്തിൽ ആതിര സന്തോഷിനും കുടുംബത്തിനും ആയി നിർമ്മിച്ചു നൽകി. വീടിന്റെ താക്കോൽദാനം സിനിമാതാരം ജോജി കെ.ജോൺ നിർവഹിച്ചു. വർഷങ്ങളായി സ്വന്തമായി ഒരു ഭവനം നിർമ്മിക്കുവാൻ സാധിക്കാതെ മൂന്ന് പെൺകുഞ്ഞുങ്ങളുമായി സുരക്ഷിതമല്ലാത്ത ഒരു ചെറിയ കുടിലിൽ ആയിരുന്നു ആതിരയും സന്തോഷും താമസിച്ചിരുന്നത്.
ഏതാനും നാളുകൾക്കു മുമ്പ് സന്തോഷിന്റെ തലയിൽ പാറവീണ് പരിക്കേറ്റ് ജോലിക്ക് പോകാൻ പറ്റാത്ത സാഹചര്യത്തിലായിരുന്നു. കുട്ടികളുടെ വിദ്യാഭ്യാസവും വീട്ടുചിലവും ചികിത്സയുമായി ബുദ്ധിമുട്ടിയിരുന്ന കുടുംബം സ്വന്തമായ ഒരു ഭവനം നിർമ്മിക്കുവാൻ കഴിയാതെ കുടിലിൽ കഴിഞ്ഞിരുന്നത് നേരിൽ കാണാൻ കഴിഞ്ഞ ടീച്ചർ ഇവർക്കായി രണ്ട് മുറികളും അടുക്കളയും ഹാളും ശുചിമുറിയും സിറ്റൗട്ടുമുള്ള വീട് വിഷു കൈനീട്ടമായി നിർമ്മിച്ചു നൽകി. ചടങ്ങിൽ വാർഡ് മെമ്പർമാരായ ഷേർളി ജോസഫ്, റെജി തോമസ്, പ്രോജക്ട് കോഡിനേറ്റർ കെ. പി. ജയലാൽ, അനീഷ് എം.കെ. എന്നിവർ പ്രസംഗിച്ചു.
