ഗാറ്റ്‌വിക്ക് : ഇംഗ്ലണ്ടിലെ ഗാറ്റ്‌വിക്കിൽ നടന്ന വേൾഡ് യൂണിയൻ ഓഫ് മാർഷ്യൽ ആർട്‌സ് ഫെഡറേഷൻസ് ലോക ചാമ്പ്യൻഷിപ്പിൽ മലയാളിയ്ക്ക് സ്വർണത്തിളക്കം. സീനിയേഴ്‌സ് കൊബുഡോ വിഭാഗത്തിൽ ക്യോഷി സൂരജ് സുനിൽ ആണ് ഈ നേട്ടം കരസ്ഥമാക്കിയത്. അന്താരാഷ്ട്ര വേദിയിൽ ഇന്ത്യയുടെ ഏക പ്രതിനിധിയായി മത്സരിച്ച സൂരജിന്റെ വിജയം രാജ്യത്തിനും മലയാളികൾക്കും അഭിമാനമായി. 30 രാജ്യങ്ങളിൽ നിന്നുള്ള മത്സരാർഥികൾ പങ്കെടുത്ത ചാമ്പ്യൻഷിപ്പിൽ ജപ്പാൻ രണ്ടാം സ്ഥാനവും ഇംഗ്ലണ്ട് മൂന്നാം സ്ഥാനവും നേടി. കടുത്ത മത്സരങ്ങൾക്കിടയിൽ മികവ് തെളിയിച്ചാണ് സൂരജ് സ്വർണത്തിലേക്ക് എത്തിയത്.
ആയോധനകലകളോടുള്ള ദീർഘകാലത്തെ അർപ്പണബോധവും ഈ രംഗത്തെ സംഭാവനകളും പരിഗണിച്ച് സൂരജിന് ബെസ്റ്റ് മാസ്റ്റർ അവാർഡ്–ഹാൾ ഓഫ് ഫെയിം 2026 ബഹുമതിയും ലഭിച്ചു. SAKI India Foundation സ്ഥാപകനായ സൂരജ് സുനിലിന് ഷോട്ടോകാൻ കരാട്ടെയിൽ ഏഴാംനില ബ്ലാക്ക് ബെൽറ്റുമുണ്ട്.
