കോന്നി : വാഴയിലകള് വിറ്റ് വത്യസ്തമായ മാര്ഗത്തിലൂടെ മികച്ച വരുമാനം നേടുകയാണ് ഇളമണ്ണൂര് സ്വദേശി നവനീതത്തില് കെ.വൈ സുരേഷും കുടുംബവും. വാഴയിലയ്ക്ക് ഓണനാളുകളില് വലിയ വിപണന സാധ്യത ഉണ്ടെന്ന് തിരിച്ചറിഞ്ഞാണ് സുരേഷ് വത്യസ്തമായൊരു കാര്ഷിക സംരംഭത്തിന് തുടക്കമിട്ടത്. പാട്ടത്തിനെടുത്ത മൂന്നേക്കര് സ്ഥലത്ത് ഏകദേശം 3000 ഞാലിപ്പൂവന് വാഴകളാണ് സുരേഷ് കൃഷി ചെയ്തത്. വാഴപ്പഴം മാത്രമായിരുന്നില്ല സുരേഷിന്റെ ലക്ഷ്യം. മികച്ച ഗുണനിലവാരമുള്ള വാഴയിലകള് ഉല്പ്പാദിപ്പിച്ച് അത് ജനങ്ങളിലേക്ക് നേരിട്ട് എത്തിച്ച് വിപണം നടത്തുവാനാണ് സുരേഷ് പ്രധാനമായും കൃഷി തുടങ്ങിയത്.
കേരളത്തില് ഓണക്കാലത്താണ് വാഴയിലയുടെ ആവശ്യം വര്ധിക്കുന്നത്. സുരേഷ് തുടങ്ങി വെച്ച ഈ വത്യസ്തമായ കൃഷി രീതി വിജയം കാണുകയും ചെയ്തു. ചിങ്ങമാസം തുടങ്ങിയതോടെ വാഴയിലകള് അന്വേഷിച്ച് സുരേഷിന്റെ ഫോണിലേക്ക് ഒട്ടേറെ ആളുകള് വിളിക്കുന്നുണ്ട്. ജില്ലയ്ക്ക് അകത്ത് നിന്നും പുറത്ത് നിന്നും വാഴയിലക്ക് നിരവധി അന്വേഷണങ്ങള് വന്നതായി സുരേഷ് പറയുന്നു. ആവശ്യത്തിനുള്ള വാഴയിലകള് വെട്ടിയെടുത്ത് വൃത്തിയാക്കി കെട്ടുകളായി തിരിച്ച് ഉപഭോക്താക്കള്ക്ക് എത്തിച്ച് നല്കുകയാണ് ഇപ്പോള് ചെയ്യുന്നത്. വാഴത്തോട്ടത്തിന്റെ പരിപാലനം മുതല് ഇല വെട്ടുന്നതിനും ഒരുക്കുന്നതിനുമെല്ലാം ഭാര്യ എസ്.ചിഞ്ചുവും മകന് അവതാറും സുരേഷിനൊപ്പമുണ്ട്.
