പന്തളം : ഭാര്യയോട് രഹസ്യ ബന്ധമുണ്ടെന്ന സംശയത്തിന്റെ പേരില് സുഹൃത്തിനെ വെട്ടി പരിക്കേൽപ്പിച്ചയാളെ പന്തളം പോലീസ് പിടികൂടി. പന്തളം കുളനട സ്വദേശി അയ്യന്തി ഉന്നതിയിൽ അജി ഭവനം രാജേഷ് രാജപ്പന് (48)ആണ് പന്തളം പോലീസിന്റെ പിടിയിലായത്. പതിനെട്ടാം തീയതി ചൊവ്വാഴ്ച ഉച്ചകഴിഞ്ഞ് 2.30 ഓടെയാണ് കേസിന് ആസ്പദമായ സംഭവം നടന്നത്. പന്തളം ടൗണിലെ ബാർ ഹോട്ടലിന് മുന്നിൽ വെച്ചാണ് ഇയാള് സുഹൃത്തിനെ ആക്രമിച്ചത്.
ബാര് ഹോട്ടലിന് മുന്നില് നിന്നിരുന്ന രാജേഷിന്റെ സുഹൃത്ത് ആങ്ങമൂഴി സ്വദേശിയെ ഇയാള് മാരകായുധം ഉപയോഗിച്ച് തലയ്ക്ക് വെട്ടി പരിക്കേൽപ്പിക്കുകയായിരുന്നു. സംഭവത്തില് കേസ് രജിസ്റ്റര് ചെയ്ത പന്തളം പോലീസ് അന്വേഷണം നടത്തുകയും പ്രതിയെ പിടികൂടുകയും ചെയ്തു. പന്തളം സർക്കിൾ ഇൻസ്പെക്ടർ ബാബു കുറുപ്പ്, എസ്.എച്ച്.ഓ എബിൻ പ്രസാദ്, പോലീസ് ഉദ്യോഗസ്ഥരായ അജീഷ്, അൻവർഷ എസ്., നിയാസ് എന്നിവർ ചേർന്നാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
