കൊച്ചി: കസ്റ്റഡിയിലെടുത്ത് ലോക്കപ്പിലാക്കിയ കെ.എസ്.യു പ്രവര്ത്തകരെ റോജി എം ജോണ് എം.എല്.എയുടെ നേതൃത്വത്തില് മോചിച്ച സംഭവത്തില് വീഴ്ച്ച വരുത്തിയ രണ്ട് പോലീസ് ഉദ്യോഗസ്ഥര്ക്ക് സസ്പെന്ഷന്. കാലടി പോലീസ് സ്റ്റേഷനിലെ എസ്.ഐ സതീഷ്, സിവില് പോലീസ് ഓഫീസര് ബേസില് എന്നിവരെയാണ് സസ്പെന്ഡ് ചെയ്തത്. പോലീസ് കസ്റ്റഡിയിലായിരുന്ന കെഎസ്യു പ്രവര്ത്തകരെ ബലം പ്രയോഗിച്ച് മോചിപ്പിച്ച സംഭവത്തില് എംഎല്എമാര്ക്കെതിരെ പോലീസ് കേസെടുത്തിരുന്നു.
ചാലക്കുടി എംഎല്എ സനീഷ് കുമാര്, അങ്കമാലി എംഎല്എ റോജി എം ജോണ് എന്നിവര്ക്കെതിരെയാണ് കേസ്. എംഎല്എമാരുടെ നേതൃത്വത്തില് ബലം പ്രയോഗിച്ച് ലോക്കപ്പ് തുറന്നാണ് പ്രതികളെ ഇറക്കിക്കൊണ്ടുപോയത്. കാലടി ശ്രീ ശങ്കര കോളേജിലെ വിദ്യാര്ത്ഥി സംഘര്ഷവുമായി ബന്ധപ്പെട്ടാണ് കെഎസ്യു പ്രവര്ത്തകരെ പോലീസ് കസ്റ്റഡിയിലെടുത്തത്. രാജീവ്, ഡിജോണ് എന്നിവരെയാണ് പോലീസ് കസ്റ്റഡിയിലെടുത്തത്. ഇവരെയാണ് എംഎല്എമാരുടെ നേതൃത്വത്തിലെത്തിയ 15 അംഗ സംഘം ബലം പ്രയോഗിച്ച് ഇറക്കിയത്.
