തൃശൂര് : മെഡിക്കല് കോളേജിലെ വനിതാ സെല്ലിനുള്ളില് നിന്ന് സ്വപ്ന ഫോണ് വിളിച്ചുവെന്ന തരത്തിലുള്ള വാര്ത്തകള് പുറത്തുവരുന്നതിനിടെ സ്വപ്ന ആരെയും വിളിച്ചില്ലെന്ന് നഴ്സുമാര് മൊഴി നല്കി. ഇന്റലിജന്സ് നടത്തിയ അന്വേഷണത്തിലും ഫോണ് വിളിച്ചതായി കണ്ടെത്താനായില്ല.
അതേസമയം ജീവനക്കാരില് ഒരാളുടെ ഫോണില് നിന്നു സ്വപ്ന തിരുവനന്തപുരത്തേക്കു വിളിച്ചതായാണ് എന്ഐഎയ്ക്കു ലഭിച്ച വിവരം. സ്വപ്ന ഇവിടെ ചികിത്സയില് കഴിഞ്ഞ 6 ദിവസങ്ങളില് വനിതാ സെല്ലില് ജോലി നോക്കിയ എല്ലാ ജീവനക്കാരുടെയും ഫോണ്വിളിയുടെ വിശദാംശങ്ങള് അന്വേഷണ സംഘം ശേഖരിച്ചിട്ടുണ്ട്. സ്പെഷ്യല് ബ്രാഞ്ചും അന്വേഷണം നടത്തുന്നുണ്ട്.
വനിതാ സെല്ലില് ഡ്യൂട്ടിയിലുണ്ടായിരുന്ന മുഴുവന് ജീവനക്കാരെയും ആശുപത്രി സൂപ്രണ്ട് വിളിച്ചുവരുത്തി ചോദ്യം ചെയ്തിരുന്നു. എന്നാല് ജീവനക്കാരിലാരും ഇത് സംബന്ധിച്ച വാര്ത്തകള് ശരിവെയ്ക്കുന്ന മൊഴികള് നല്കിയില്ല. മെഡിക്കല് കോളേജ് പ്രിന്സിപ്പല് റിപ്പോര്ട്ട് ഇന്ന് ജയില്വകുപ്പിന് കൈമാറും.
