ബെംഗളുരു: അപകീര്ത്തികരമായ ആരോപണം ഉന്നയിച്ചതിന് എം വി ഗോവിന്ദന് നല്കിയ മാനനഷ്ടക്കേസിന് മറുപടിയുമായി സ്വപ്ന. മാപ്പ് പറയാന് ഉദ്ദേശിക്കുന്നില്ലെന്ന് സ്വപ്ന സുരേഷ് പറഞ്ഞു. വിജേഷ് പിള്ളയെ എം വി ഗോവിന്ദന് അയച്ചു എന്ന് ഫേസ്ബുക്ക് ലൈവില് പറഞ്ഞിട്ടില്ല. തന്നെ എം വി ഗോവിന്ദന് അയച്ചുവെന്ന് വിജേഷ് പിള്ള പറഞ്ഞതായാണ് പറഞ്ഞത്. അതിനാല് എം വി ഗോവിന്ദന് അയച്ച മാനനഷ്ട നോട്ടീസ് അടിസ്ഥാനരഹിതമെന്നും സ്വപ്ന സുരേഷ് പറഞ്ഞു. ചില്ലിക്കാശ് പോലും നഷ്ടപരിഹാരത്തുക നല്കില്ലെന്നും വക്കീല് നോട്ടീസിനുള്ള മറുപടിയില് സ്വപ്ന പറഞ്ഞു.
എം വി ഗോവിന്ദനെക്കുറിച്ച് വിജേഷ് പിള്ള പറഞ്ഞാണ് അറിയുന്നത്. ആരാണ് എം വി ഗോവിന്ദനെന്നോ പാര്ട്ടി പദവിയെന്തെന്നോ അതിന് മുമ്പ് അറിയുമായിരുന്നില്ല. അതിനാല്ത്തന്നെ സമൂഹത്തില് നല്ല പേരിന് കോട്ടം തട്ടിക്കാനുദ്ദേശിച്ചുള്ള പ്രസ്താവനയെന്ന വാദം നിലനില്ക്കില്ലെന്നും സ്വപ്ന പറയുന്നു. മാര്ച്ച് 9ന് ഫേസ്ബുക്ക് ലൈവിലൂടെയാണ് സ്വപ്ന സുരേഷ് ആരോപണം ഉന്നയിച്ചത്.
