തിരുവനന്തപുരം : സ്വര്ണക്കടത്ത് കേസില് സ്വപ്ന സുരേഷിന്റെ പുതിയ വെളിപ്പെടുത്തലുകളെന്ന പേരില് പ്രചരിക്കുന്നതെല്ലാം നുണകളാണെന്ന് എല്ഡിഎഫ് കണ്വീനര് ഇ.പി ജയരാജന്. രഹസ്യമൊഴി രേഖപ്പെടുത്തിയ ഉടനെ തന്നെ അത് മാധ്യമങ്ങളോട് വെളിപ്പെടുത്തുന്നത് രാഷ്ട്രീയ ഗൂഢാലോചനയുടെ ഭാഗമാണെന്നും, മുന്പ് മുഖ്യമന്ത്രിയെ കുടുക്കാന് ഇഡി സമ്മര്ദ്ദം ചെലുത്തിയതായി സ്വപ്ന വെളിപ്പെടുത്തിയതാണെന്ന് നാം ഓര്ക്കണമെന്നും അദ്ദേഹം പറഞ്ഞു.
എല്ഡിഎഫിന് തുടര്ഭരണം ലഭിക്കുകയും കഴിഞ്ഞ ഒരു വര്ഷക്കാലം കൊണ്ട് തന്നെ ജനങ്ങള്ക്ക് നല്കിയ വാഗ്ദാനങ്ങളില് ബഹുഭൂരിപക്ഷവും നടപ്പാക്കുന്നതിന് നേതൃത്വം നല്കി വരികയുമാണ്. ഈ ഘട്ടത്തില് അത്തരം ചര്ച്ചകളില് നിന്ന് ജനശ്രദ്ധ തിരിച്ചുവിടാന് സര്ക്കാരിന് നേതൃത്വം നല്കുന്ന മുഖ്യമന്ത്രിക്കെതിരായി തന്നെ വീണ്ടും രംഗത്തിറങ്ങിയിരിക്കുകയാണെന്നും ജയരാജന് പറഞ്ഞു.
