പത്തനംതിട്ട : മാലിന്യമുക്തവും പരിസ്ഥിതി സൗഹൃദവുമായ ഓണാഘോഷം പ്രോത്സാഹിപ്പിക്കുന്നതിനായി ആവിഷ്കരിച്ച ‘ഹരിത ഓണം 2026’ പദ്ധതിയുടെ ലോഗോ പ്രകാശനം ചെയ്തു. പത്തനംതിട്ട തദ്ദേശ സ്വയംഭരണ വകുപ്പ് ജോയിന്റ് ഡയറക്ടറുടെ ഓഫീസില് നടന്ന ചടങ്ങില് ജോയിന്റ് ഡയറക്ടര് സയൂജ ടി.കെ ലോഗോ പ്രകാശനം നിര്വ്വഹിച്ചു. ഓണാഘോഷങ്ങളിൽ ഹരിത ചട്ടങ്ങൾ പാലിക്കുന്നതിനും മാലിന്യ നിർമ്മാർജനം ഉറപ്പാക്കുന്നതിനുമുള്ള ബോധവത്കരണ പ്രവർത്തനങ്ങൾക്കാണ് ലോഗോ പ്രകാശനത്തിലൂടെ തുടക്കം കുറിച്ചത്.
ഒറ്റത്തവണ ഉപയോഗിക്കുന്ന പ്ലാസ്റ്റിക് വസ്തുക്കളുടെ ഉപയോഗം ഒഴിവാക്കുക, മാലിന്യം ഉറവിടത്തിൽ തന്നെ തരംതിരിച്ച് ശേഖരിക്കുക, പുനരുപയോഗിക്കാവുന്ന വസ്തുക്കൾ ഉപയോഗിക്കുക തുടങ്ങിയ പരിസ്ഥിതി സൗഹൃദ സന്ദേശങ്ങളാണ് ഹരിത ഓണം 2026 മുന്നോട്ട് വെക്കുന്നത്. ജനപങ്കാളിത്തത്തോടെ മാലിന്യമുക്തവും ഹരിതാഭവുമായ ഓണം ആഘോഷിക്കുന്നതിനായി എല്ലാവരും ഹരിത ചട്ടങ്ങൾ പാലിക്കണമെന്ന് അധികൃതർ അറിയിച്ചു. ജില്ലാ ഡെപ്യൂട്ടി ഡയറക്ടർ രാജേഷ് കുമാർ പി., പ്രോജക്ട് ഡയറക്ടർ വിനോദ് കുമാർ കെ.ഇ., ശുചിത്വമിഷൻ ജില്ലാ കോ – ഓർഡിനേറ്റർ വിനീത് കെ.എം എന്നിവർ പങ്കെടുത്തു.
