കൊച്ചി : ഗാന്ധി കുടുംബത്തിനെതിരെ രൂക്ഷവിമര്ശനവും പരിഹാസവുമായി സാഹിത്യകാരന് ടി പത്മനാഭന്. കോണ്ഗ്രസിന്റെ പരാജയ കാരണം കോണ്ഗ്രസുകാര് തന്നെയാണെന്നും അതിനിനി വേറെ ആരെയും കുറ്റം പറയേണ്ട കാര്യമില്ലെന്നും ടി പത്മനാഭന് പറയുന്നു. അട്ടയെപ്പോലെ ചിലര് അധികാരത്തില് കടിച്ച് തൂങ്ങിയതാണ് തോല്വികള്ക്ക് പിന്നാലെയുള്ള തോല്വികള്ക്ക് കാരണമെന്നും ടി പത്മനാഭന് പരിഹസിച്ചു.
അമേഠിയില് സ്ഥിരമായി ജയിക്കുമെന്ന് രാഹുല് ധരിച്ചു. ഒടുവില് സ്മൃതി ഇറാനി അവിടെ ജയിച്ച്, രാഹുലിന് വയനാട്ടിലേക്ക് വരേണ്ടി വന്നു. റോബര്ട്ട് വദ്ര രാഷ്ട്രീയത്തിലിറങ്ങുമെന്ന് നേരത്തേ പ്രഖ്യാപിച്ചിരുന്നു. ഇനി വദ്ര വരാത്ത കുറവേ കോണ്ഗ്രസിനുള്ളൂ – ടി പത്മനാഭന് പരിഹസിക്കുന്നു. രാഹുല് ഗാന്ധിജി തോറ്റത് സ്ഥിരമായി അമേഠി കിട്ടുമെന്ന് കരുതിയിരുന്നിട്ടാണ്. സ്മൃതി ഇറാനിയുടെ ആരാധകനല്ല ഞാന്. ആവുകയുമില്ല. ഒരു കാര്യത്തില് അവരോട് ഞാന് ഹാറ്റ്സ് ഓഫ് പറയുന്നു. തോറ്റ ശേഷം സ്ഥിരമായി അവരാ മണ്ഡലത്തില് പോയി. അവിടെ പ്രവര്ത്തിച്ചു. രാഹുലോ, അഞ്ച് വര്ഷത്തിന് ശേഷമാണ് പിന്നെ അവിടെ പോയത്’
1940 മുതല് താന് കോണ്ഗ്രസുകാരനാണെന്ന് ടി പത്മനാഭന് പറയുന്നു. തൊണ്ണൂറ്റി മൂന്നാം വയസ്സിലും താന് ഗാന്ധിയനായി, കോണ്ഗ്രസുകാരനായി തുടരുന്നു. 1943 മുതല് താന് ഖദര് ധരിക്കുന്നു. ഇപ്പോഴും ഖദര് ധരിക്കുന്നത് തുടരുന്നു. ഏത് ലോകരാജ്യത്ത് പോയാലും താന് ഖദര് മാത്രമേ ധരിച്ചിട്ടുള്ളൂ. സ്വാതന്ത്ര്യത്തിന് ശേഷം സജീവരാഷ്ട്രീയത്തിലില്ല താനെന്നും അധികാരരാഷ്ട്രീയത്തിലേക്ക് ഒരിക്കലും വരാനാഗ്രഹിക്കുകയോ താത്പര്യം കാണിക്കുകയോ ചെയ്തിട്ടില്ലെന്നും ടി പത്മനാഭന് പറയുന്നു.