കൊച്ചി: യാത്രക്കാരിയുടെ ബാഗില് നിന്നും പണം മോഷ്ടിച്ച തമിഴ്നാട് സ്വദേശിനി അറസ്റ്റില്. പള്ളിക്കര- എറണാകുളം റൂട്ടില് ഓടുന്ന ബസില് മോഷണം നടത്തിയ തമിഴ്നാട് ചെന്നൈ എംഒആര് നഗര് കോളനിയില് താമസിക്കുന്ന പ്രിയ (23) ആണ് അറസ്റ്റിലായത്. പണയ സ്വര്ണം തിരിച്ചെടുക്കാന് കരുതിയ 17000 രൂപയാണ് അത്താണി സ്വദേശിനിയായ വീട്ടമ്മയുടെ ബാഗില് നിന്നു മോഷ്ടിക്കപ്പെട്ടത്. മറ്റൊരു സ്ത്രീയുടെ ബാഗില് നിന്ന് 1000 രൂപയും മോഷ്ടിച്ചു. പണം അടങ്ങിയ ബാഗ് കൈവശമുള്ളവരെ രണ്ടോ മൂന്നോ പേരുള്ള സംഘം ചേര്ന്ന് കൈയും മുഖവും അനക്കാന് പറ്റാത്ത വിധത്തില് പ്രത്യേക രീതിയില് ലോക്ക് ചെയ്ത ശേഷമാണ് ഇവര് സിബ് തുറന്ന് മോഷണം നടത്തുന്നത്.
പണം നഷ്ടപ്പെട്ട വിവരം അറിഞ്ഞ പരാതിക്കാരി ബഹളം ഉണ്ടാക്കിയതിനെ തുടര്ന്ന് ബസ് കാക്കനാട് ഐഎംജി ജങ്ഷന് അടുത്ത് നിര്ത്തുകയായിരുന്നു. ബസ് നിര്ത്തിയ ഉടന് ഓടി രക്ഷപെടാന് ശ്രമിച്ച പ്രിയയെ നാട്ടുകാരും വാഹനത്തില് ഉണ്ടായിരുന്ന സ്ത്രീകളും ചേര്ന്നാണ് പിടികൂടിയത്. പ്രിയയുടെ പക്കല് നിന്ന് 7000 രൂപ കണ്ടെടുത്തു. ബഹളത്തിനിടെ ബാക്കിയുള്ള മോഷ്ടാക്കള് പണവുമായി കടന്നുകളഞ്ഞു. സ്ഥലത്തുനിന്ന് രക്ഷെപെട്ട ബാക്കി പ്രതികള്ക്കായി തെരച്ചില് നടത്തി വരികയാണ്.
