ചാലക്കുടി : മരച്ചീനി കൃഷിയില് സംസ്ഥാനത്ത് ഒന്നാം സ്ഥാനത്ത് നില്ക്കുന്ന മേലൂര് പഞ്ചായത്തില് കര്ഷര്ക്ക് ദുരിതമായി വൈറസ് ബാധ. പൂലാനി കൊമ്പിച്ചാല് പാടശേഖരത്തിലും പൂത്തുരുത്തി പാലത്തിനു സമീപത്തെ പാടശേഖരങ്ങളിലെ ഏക്കറുകളോളം മരിച്ചീനി കൃഷിയിടത്തിലാണ് വൈറസ് ബാധ കണ്ടെത്തിയത്. കാഴ്ചയില് രോഗബാധ തോന്നില്ലെങ്കിലും മരിച്ചീനി പറിച്ചെടുത്താല് കിഴങ്ങ് അഴുകിപ്പോയിരിക്കുന്നതോ അല്ലെങ്കില് കിഴങ്ങ് മുറിച്ച് നോക്കിയാല് മഞ്ഞ ബാധിച്ച് ഇരിക്കുന്നതോ ആയി കാണാമെന്നതാണ് രോഗം.
2018ലെ പ്രളയവും അതിനുശേഷം കോവിഡും കാരണം വിപണി തകര്ന്നതോടെ കര്ഷകര് ഇത്തവണ നഷ്ടം നികത്താമെന്ന പ്രതീക്ഷയിലായിരുന്നു. കിലോക്ക് 24 രൂപക്ക് തോട്ടത്തില്നിന്ന് പറിച്ച് കൊണ്ടുപോകാന് ആവശ്യക്കാര് ഏറെയുള്ളപ്പോഴാണ് വൈറസ് രൂപത്തില് കര്ഷകരെ ദുരിതം വേട്ടയാടുന്നത്. കൃഷി ഓഫിസര് എത്തി പരിശോധന നടത്തി. കൂടുതല് പരിശോധനക്ക് വൈറസ് ബാധിച്ച മരച്ചീനി തിരുവനന്തപുരത്തേക്ക് അയച്ചിരിക്കുകയാണ്. ദുരിതത്തിലായ കര്ഷകര്ക്ക് നഷ്ടപരിഹാരത്തിന് കൃഷി വകുപ്പും മറ്റ് അധികാരികളും ഇടപെടണമെന്നാണ് കര്ഷകരുടെ ആവശ്യം.
