പത്തനംതിട്ട : സാധാരണക്കാരന്റെ ഇഷ്ടപാനീയമായ ചായയ്ക്ക് പത്തനംതിട്ട ജില്ലയിലെ ഹോട്ടലുകളില് വില കുതിക്കുന്നു. 12 രൂപ വിലയുണ്ടായിരുന്ന ചായയ്ക്ക് ഇപ്പോള് 15 രൂപയാണ് വില. ഗ്യാസ് വില വര്ധനവാണ് ചായയുടെ വില കൂട്ടുവാന് കാരണമായതെന്നാണ് കച്ചവടക്കാര് പറയുന്നത്. ഗ്യാസ് ക്ഷാമത്തെ തുടര്ന്ന് ജില്ലയിലെ ഹോട്ടലുകളില് ചായയ്ക്ക് പതിമൂന്ന് രൂപ വില നിലവില് വന്നിരുന്നു. ചെറുകടികള്ക്കും പതിമൂന്ന് രൂപയാണ് ഹോട്ടലുകള് ഈടാക്കുന്നത്. ബ്രൂ കോഫിക്ക് 20 രൂപയും ബൂസ്റ്റ്, ഹോര്ലിക്സ്, ബദാം മില്ക്ക് എന്നിവയ്ക്ക് 25 രൂപയുമാണ് ഹോട്ടലുകള് ഈടാക്കുന്നത്. പല ഹോട്ടലുകളും പുതുക്കിയ വില സംബന്ധിച്ച് നോട്ടീസും പതിപ്പിച്ചിട്ടുണ്ട്. ചായയ്ക്ക് അടിക്കടിയുണ്ടായ വില വര്ധനവ് ജില്ലയിലെ സാധാരണക്കാരായ തൊഴിലാളികളെയും ചായകുടി ശീലമാക്കിയ പ്രായമായവരെയും സാരമായി ബാധിച്ചിട്ടുണ്ട്.
ഹോട്ടലുകള് ചായയ്ക്ക് വില വര്ദ്ധിപ്പിച്ചപ്പോള് തമിഴ്നാട് സ്വദേശികള് നടത്തുന്ന ചെറിയ ചായക്കടകളില് വില വലിയ രീതിയില് വര്ദ്ധിച്ചിട്ടുമില്ല. ബിരിയാണി അടക്കമുള്ള ഭക്ഷണം വിലക്കുറവില് ലഭിക്കുമെന്നതിനാല് ആളുകള് കൂടുതലും ഇത്തരം കടകളെയാണ് ഇപ്പോള് ആശ്രയിക്കുന്നത്. മലയാളികള് നടത്തുന്ന ഹോട്ടലുകളില് ബിരിയാണിക്ക് 150 രൂപ ഈടാക്കുമ്പോള് 100 രൂപയ്ക്കാണ് തമിഴ്നാട് സ്വദേശികള് നടത്തുന്ന ഹോട്ടലുകളില് ബിരിയാണി വില്ക്കുന്നത്. ഇതിനാല് തന്നെ വലിയ തിരക്കാണ് ഇത്തരം കടകളില് അനുഭവപ്പെടുന്നത്.
