ദില്ലി: അഴിമതിക്കേസില് ബിഹാര് ഉപമുഖ്യമന്ത്രി തേജസ്വി യാദവ് സിബിഐക്ക് മുന്നില് ഹാജരായി. രാവിലെ 10.30 ഓടെയാണ് ഡല്ഹിയിലെ സെന്ട്രല് ബ്യൂറോ ഓഫ് ഇന്വെസ്റ്റിഗേഷന് ഓഫീസില് തേജസ്വി എത്തിയത്. ലാലു പ്രസാദ് യാദവ് കേന്ദ്ര റെയില്വേ മന്ത്രിയായിരിക്കെ, ഭൂമി കൈക്കൂലിയായി കൈപ്പറ്റി നിരവധി പേര്ക്ക് റെയില്വേയില് ജോലി ശരിയാക്കി നല്കിയെന്നാണ് കേസ്. യാദവിനെ ഈ മാസം അറസ്റ്റ് ചെയ്യില്ലെന്ന് സിബിഐ കഴിഞ്ഞ ആഴ്ച ഡല്ഹി ഹൈക്കോടതിക്ക് ഉറപ്പ് നല്കിയിരുന്നു.
കേസില് ലാലു പ്രസാദ് യാദവിനൊപ്പം ഭാര്യയും മുന് ബിഹാര് മുഖ്യമന്ത്രിയുമായ റാബ്രി ദേവി, മക്കളായ മിസ ഭാരതി, ഹേമ യാദവ് എന്നിവരും പ്രതികളാണ്. 2005 നും 2009 നും ഇടയില് നടന്നതായി ആരോപിക്കപ്പെടുന്ന കുറ്റങ്ങള്ക്ക് അഴിമതി നിരോധന നിയമത്തിലെയും ഐപിസിയുടെ ക്രിമിനല് ഗൂഢാലോചന വകുപ്പിലെയും വ്യവസ്ഥകള് അനുസരിച്ചാണ് സിബിഐ കേസ് ഫയല് ചെയ്തത്.
