തൃശ്ശൂര്‍: ഉത്സവത്തിന് തിടമ്പേറ്റാന്‍ എത്തിച്ച ആന കാണിച്ച കുസൃതിയെ തുടര്‍ന്ന് ഭഗവതിയുടെ തിടമ്പേറ്റിയത് മാരുതി ഒമിനി വാന്‍. കഴിഞ്ഞ വെള്ളിയാഴ്ചയായിരുന്നു സംഭവം. പീച്ചി തുണ്ടത്ത് ദുര്‍ഗ ഭഗവതി ക്ഷേത്രത്തിലെ ഉത്സവത്തിന് തിടമ്പേറ്റാനായിട്ടാണ് ചോപ്പീസ് കുട്ടിശങ്കരന്‍ എന്ന ആനയെ എത്തിച്ചത് . തിടമ്പേറ്റുന്നതിന് മുന്നോടിയായി കുളിപ്പിക്കാന്‍ കനാലില്‍ ഇറങ്ങിയ കുട്ടിശങ്കരന്‍ തിരിച്ച്‌ കരക്ക് കയറാന്‍ തയ്യാറായില്ല . ഇതോടെയാണ് ആനയ്ക്ക് പകരം ഒമ്നി വാനില്‍ തിടമ്പേറ്റാന്‍ ക്ഷേത്രം ഭാരവാഹികള്‍ തീരുമാനിച്ചത്.
പൊടിപ്പാറയില്‍ ഇടതുകര കനാലിലാണ് എഴുന്നള്ളിപ്പിന് മുമ്പ് ആനയെ കുളിപ്പിക്കാനിറക്കിയത്. എന്നാല്‍ വെളത്തില്‍ ഇറക്കിയ ആന തിരികെ കയറാന്‍ കൂട്ടാക്കിയില്ല . രണ്ടര മണിക്കൂറോളം നേരം വെള്ളത്തില്‍ തന്നെ കിടന്നു . കനാലിലെ ചെറിയ ഒഴുക്കുള്ള വെള്ളത്തിന്റെ കുളിരില്‍ രസിച്ചുകിടന്ന ആനയെ തിരിച്ച്‌ കയറ്റാന്‍ പപ്പാന്‍ ഏറെ ശ്രമം നടത്തിയെങ്കിലും ഫലമുണ്ടായില്ല . രാവിലെ ഒമ്പത് മണിക്ക് കുളിക്കാനിറങ്ങിയ ആന ഒരു മണിയോടെയാണ് കരയ്ക്ക് കയറിയത്.
തുടര്‍ന്ന് വനം വകുപ്പുദ്യോഗസ്ഥര്‍ ആനയ്ക്ക് ഉത്സവ എഴുന്നള്ളിപ്പിനുള്ള അനുമതി നിഷേധിച്ചു. ഇതോടെ നെറ്റിപ്പട്ടം അണിഞ്ഞ് ഭഗവതിയുടെ തിടമ്പുമേറ്റി ഒമിനി വാന്‍ എഴുന്നള്ളിപ്പിന് ഇറങ്ങുകയായിരുന്നു.
