മല്ലപ്പള്ളി: ഉന്നത വിദ്യാഭ്യാസം നേടിയിട്ടും കൃഷിയെയും മണ്ണിനെയും സ്നേഹിച്ച് കർഷകനായി ജീവിക്കുന്ന തങ്കച്ചൻ എന്ന കെ.എ കുര്യൻ നവതി നിറവിൽ. വിവിധ സംഘടനകളുടെ നേതൃത്വത്തിൽ നവതി ആഘോഷം നടത്തുന്നു. വെള്ളിയാഴ്ച രാവിലെ 10 ന് കവിയൂർ ശാലേം മാർത്തോമ്മാ ഇടവക പാരിഷ് ഹാളിൽ നവതി ആഘോഷം നടക്കും. അഡ്വ. മാത്യു ടി. തോമസ് എംഎൽഎ നവതി ആഘോഷങ്ങൾ ഉദ്ഘാടനം ചെയ്യും. ഡോ. സിറിയക് തോമസ് മുഖ്യപ്രഭാഷണം നടത്തും.
അക്കീരമൻ കാളിദാസ ഭട്ടതിരിപ്പാട് അനുഗ്രഹ പ്രഭാഷണം നടത്തും. പുനലൂർ സോമരാജൻ ചാരിറ്റി പ്രവർത്തനങ്ങളുടെ ഉദ്ഘാടന നിർവഹിക്കും. ചലച്ചിത്ര സംവിധായകൻ ബ്ലെസി, മലയാള മനോരമ അസിസ്റ്റന്റ് എഡിറ്റർ വർഗീസ് സി. തോമസ്, കവിയൂർ കൊച്ചിയിൽ കുടുംബയോഗം പ്രസിഡന്റ് മാത്തുക്കുട്ടി കോശി, ഇന്ത്യൻ ഓവർസീസ് കോൺഗ്രസ് യു.കെ പ്രസിഡന്റ് ഷിനു ക്ലാര മാത്യുസ് തുടങ്ങിയവർ സംസാരിക്കും. തുടർന്ന് പഴയ ചലച്ചിത്ര നാടകഗാനങ്ങൾ കോർത്തിണക്കിയ ഗാനാർച്ചനയും നടക്കും.
