കോന്നി : കോന്നി മഠത്തില്ക്കാവ് റോഡില് പൊതു ജനങ്ങള്ക്ക് ഇരിക്കുവാനും വിശ്രമിക്കുവാനുമായി സ്ഥാപിച്ച ഇരിപ്പിടങ്ങള് സംരക്ഷണമില്ലാതെ നശിക്കുന്നു. എം.എല്.എ യുടെ ഫണ്ടില് നിന്നും അനുവദിച്ച പണം ഉപയോഗിച്ചാണ് നാല് മണിക്കാറ്റ് മാതൃകയില് കോന്നി മഠത്തില്ക്കാവ് റോഡില് ഇരിപ്പിടങ്ങളും ലൈറ്റുകളും പൂച്ചട്ടികളും എല്ലാം സ്ഥാപിച്ചത്. വൈകുന്നേരങ്ങളില് പ്രായഭേദമന്യേ ആളുകള് സമയം ചിലവഴിക്കാനായി ഇവിടെ എത്തിയിരുന്നു. വൈകുന്നേര സമയങ്ങളില് വലിയ തിരക്കാണ് ഇവിടെ ഉണ്ടായിരുന്നത്. എന്നാല് പദ്ധതി സംരക്ഷിക്കേണ്ട കോന്നി ഗ്രാമപഞ്ചായത്ത് ഇവിടേക്ക് തിരിഞ്ഞു നോക്കാതെ വന്നത്തോടെ പദ്ധതി കാടുകയറിത്തുടങ്ങി.
ഇരിപ്പിടങ്ങള് പലതും കാടുവളര്ന്ന് ഇതിനുള്ളിലായി. വഴിയോരങ്ങളില് സ്ഥാപിച്ച ലൈറ്റുകളിലും കാടുകയറിയിട്ടുണ്ട്. വൈകുന്നേരങ്ങളില് ചെറിയ ആഘോഷങ്ങള്ക്കും ആളുകള് ഇവിടെ എത്തിയിരുന്നു. പിറന്നാള് ആഘോഷിക്കാന് എത്തുന്നവര് ആയിരുന്നു അധികവും. വിവാഹ ആല്ബങ്ങള് ചിത്രീകരിക്കുന്ന ഫോട്ടോഗ്രാഫര്മാരുടെ ഇഷ്ട ലൊക്കേഷന് കൂടിയായിരുന്നു ഈ ഭാഗം. ഇതിനെ ചുറ്റിപ്പറ്റി ചെറിയ കച്ചവട സ്ഥാപനങ്ങളും പ്രവര്ത്തിച്ചിരുന്നു. ഇടക്കൊക്കെ തൊഴിലുറപ്പ് പദ്ധതിയില് ഉള്പ്പെടുത്തി കാട് വെട്ടിത്തെളിച്ചിരുന്നു എങ്കിലും പിന്നീട് അതും ഇല്ലാതെയായി. പദ്ധതി കാട് മൂടിയതോടെ നിരാശയിലാണ് ഇവിടെ എത്തുന്നവരും.
