തിരുവനന്തപുരം: കേരളത്തെക്കുറിച്ച് വാചാലനായി ഗായകനും സംഗീത സംവിധായകനുമായ ശങ്കർ മഹാദേവൻ. രാജ്യത്തെ ഏറ്റവും മികച്ച ഭക്ഷണവും സിനിമയും കേരളത്തിലാണെന്ന് അദ്ദേഹം പറഞ്ഞു. ഉടൻ റിലീസിനൊരുങ്ങുന്ന ‘ചത്താ പച്ച’ എന്ന മലയാള സിനിമയുടെ ട്രെയിലർ ലോഞ്ചിൽ പങ്കെടുത്ത് സംസാരിക്കുമ്പോഴാണ് ശങ്കർ മഹാദേവന്റെ പ്രതികരണം. ശങ്കർ–ഇഹ്സാൻ–ലോയ് കൂട്ടുകെട്ട് സംഗീതമൊരുക്കുന്ന ‘ചത്താ പച്ച’യാണ് തങ്ങളുടെ ആദ്യ മലയാള സിനിമയെന്ന് ശങ്കർ മഹാദേവൻ വ്യക്തമാക്കി. 30 വർഷമായി ഹിന്ദി സിനിമയിൽ പ്രവർത്തിക്കുന്ന തങ്ങൾക്ക് മലയാളത്തിലേക്കുള്ള വരവ് വൈകിയത് അവസരം ലഭിക്കാത്തതിനാലാണെന്നും ഇപ്പോൾ ഈ അനുഭവം വലിയ അഭിമാനമാണെന്നും അദ്ദേഹം പറഞ്ഞു.
ഗാനരചയിതാവ് വിനായക് ശശികുമാർ കയ്യടി അർഹിക്കുന്നുവെന്നും മലയാളി പ്രേക്ഷകർ നൽകിയ സ്നേഹത്തിനും അംഗീകാരത്തിനും നന്ദിയുണ്ടെന്നും ശങ്കർ പറഞ്ഞു. കഴിഞ്ഞ പത്ത് വർഷത്തിനിടെ ഇന്ത്യയിലെ ഏറ്റവും മികച്ച സിനിമകൾ മലയാളത്തിൽ നിന്നാണ് വന്നതെന്നും അദ്ദേഹം അഭിപ്രായപ്പെട്ടു. സനൂപ് തൈക്കൂടത്തിന്റെ തിരക്കഥയിൽ അദ്വൈത് നായർ സംവിധാനം ചെയ്യുന്ന ചിത്രമാണ് ‘ചത്താ പച്ച’. അർജുൻ അശോകൻ, റോഷൻ മാത്യു, വിശാഖ് നായർ എന്നിവർ പ്രധാന വേഷങ്ങളിൽ എത്തുന്നു. മമ്മൂട്ടി അതിഥിവേഷത്തിലെത്തുമെന്ന റിപ്പോർട്ടുകളും പുറത്തുവരുന്നുണ്ട്. ആനന്ദ് സി. ചന്ദ്രൻ ഛായാഗ്രഹണവും പ്രവീൺ പ്രഭാകർ എഡിറ്റിംഗും നിർവഹിക്കുന്നു. ജനുവരി 22നാണ് ചിത്രം തിയേറ്ററുകളിലെത്തുന്നത്.
