റാന്നി: 10 വർഷമായി സമ്മിശ്ര കൃഷി ചെയ്ത് വരുന്ന അംഗപരിമിതനായ ജൈവ കർഷകന് വെച്ചൂച്ചിറ അരീപ്പറമ്പിൽ വർഗീസ് തോമസ് (മനു തോമസ്) ഏറ്റവും മികച്ച ഭിന്നശേഷി കര്ഷകനായി തിരഞ്ഞെടുത്തു. കാർഷിക വികസന കർഷക ക്ഷേമ വകുപ്പ് സംസ്ഥാന അവാർഡിൽ പുതുതായി ഉൾപ്പെടുത്തിയ വിഭാഗം ആണ് ഭിന്നശേഷി പുരസ്കാരം. ഈ വിഭാഗത്തിലെ പ്രഥമ അവാർഡ് ജേതാവാണ് 44 കാരനായ വർഗീസ് തോമസ് (മനു തോമസ് ). പത്തനംതിട്ട ജില്ലയിൽ വെച്ചൂച്ചിറ കൃഷിഭവൻ പരിധിയിൽ വരുന്ന വീടിനോടു ചേർന്ന 6.5 ഏക്കർ സ്ഥലത്താണ് സമ്മിശ്ര കൃഷി ചെയ്തു വരുന്നത്.
ഫലവൃക്ഷങ്ങളായ വാഴ 700 എണ്ണം, നെല്ലി 5, പ്ലാവ് 40, മാവ് 15, ശീമ പ്ലാവ് 10, പപ്പായ, കൈതച്ചക്ക, സപ്പോട്ട, മുള്ളാത്ത, സീതപ്പഴം, അവകാഡോ, ഡ്രാഗൺ, റംബുട്ടാൻ, മാങ്കോസ്റ്റിൻ, അബിയു, ദുരിയാൻ മുതലായവയും, മറ്റു സുഗന്ധ വിളകളായ ഏലം, വാനില, ഇഞ്ചി, ജാതി 25, കുരുമുളക് 500, മഞ്ഞൾ, കുടംപുളി തുടങ്ങിയവയും പച്ചക്കറികളായ ചീര, വെണ്ട, വഴുതന, മുളക്, ശീതകാല പച്ചക്കറി ഇനങ്ങളായ കാബ്ബജ്, കോളിഫ്ലവർ , കിഴങ്ങു വർഗ്ഗത്തിൽ പെട്ട ചേന, ശീമ ചേമ്പ്, ചെറു ചേമ്പ്, കാച്ചിൽ വർഗ്ഗത്തിൽ പെട്ട വലിയ കാച്ചിൽ, ചെറു കിഴങ്ങു, മധുര കിഴങ്ങു, കപ്പ എന്നിവയും വാണിജ്യ അടിസ്ഥാനത്തിൽ കശുമാവ് 85 എണ്ണം റബ്ബർ 250 കാപ്പി 400 തെങ്ങു 110 കമുക് 350 കൊക്കോ 110 കൂടാതെ കാലിത്തീറ്റ വിളകളായ കോ-3, സങ്കര നേപ്പിയർ പച്ചില വളച്ചെടികളായി ഡെയിഞ്ച, ശീമക്കൊന്ന, കൊഴിഞ്ഞില് മുറുക്ക് മുതലായവയും തേക്ക് 200 എണ്ണം മുള 7 ആഞ്ഞിലി 40 മഹാഗണി 30 തേമ്പാവ് 10 വേങ്ങ 10 ചടച്ചി 15 പുന്ന 3 മുതലായവ ഈ കൃഷിയിടത്തിൽ കാണപ്പെടുന്നു. മനു തോമസിന്റെ മാതാപിതാക്കൾ ആയ എ.വി തോമസ്, അന്നമ്മ തോമസ് എന്നിവരും മികച്ച കർഷകരാണ്. മനു തോമസിന്റെ മകനായ ഏബൽ തോമസ് കഴിഞ്ഞ വർഷത്തെ മികച്ച കുട്ടി കർഷകനുള്ള അവാർഡ് കരസ്ഥമാക്കിയിട്ടുണ്ട്. ഭാര്യയായ മിനിതോമസിന്റെയും മക്കളായ ഏബൽ തോമസ്, അനു തോമസ്, നിയ തോമസ് എന്നിവരുടെ മികച്ച പിന്തുണയാണ് മനു തോമസിനെ ഈ അവാർഡിനു അർഹനാക്കിയത്.
