പന്തളം: വയനാട് ദുരന്തഭൂമിയിൽ നൂറുകണക്കിന് സഹോദരങ്ങളുടെ വിയോഗത്തിലും നാശനഷ്ടത്തിലും കേരളമാകെയും ഇന്ത്യയും ലോകരാജ്യങ്ങളും മരവിച്ചു നിൽക്കുമ്പോൾ പന്തളം നഗരസഭ അധ്യക്ഷയുടെ നേതൃത്വത്തിൽ കേക്കുമുറിച്ച് ആഘോഷം. കേരള സർക്കാർ രണ്ടു ദിവസത്തെ ഔദ്യോഗിക ദുഖാചരണം പ്രഖ്യാപിച്ചിരിക്കുന്ന സാഹചര്യത്തിൽ അധ്യക്ഷയുടെ നേതൃത്വത്തിൽ മനുഷ്യത്വരഹിതമായ പ്രവർത്തനത്തിൽ കോൺഗ്രസ് പന്തളം മണ്ഡലം കമ്മിറ്റി ശക്തമായി പ്രതിഷേധിച്ചു. ജനാധിപത്യ ബോധവും മാന്യതയും അല്പമെങ്കിലും ഉണ്ടെങ്കിൽ നഗരസഭ അധ്യക്ഷ എത്രയും വേഗം രാജിവെക്കണമെന്ന് പ്രതിഷേധയോഗം ആവശ്യപ്പെട്ടു.
നഗരസഭയുടെ നിയന്ത്രണത്തിലുള്ള അറത്തിൽ മുക്ക് വെൽനസ് സെൻറർ വാർഷിക ആഘോഷമാണ് നഗരസഭ അധ്യക്ഷയുടെ നേതൃത്വത്തിൽ മനുഷ്യ മനസാക്ഷിക്ക് നിരക്കാത്ത വിധത്തിൽ ഭരണസമിതി അംഗങ്ങൾ ഉൾപ്പെടെ കേക്ക് മുറിച്ചും കലാപരിപാടികളോട് കൂടിയും ആഘോഷിച്ചത്. ഈ പ്രവർത്തനം പന്തളത്തെ ജനതയ്ക്ക് തന്നെ അപമാനകരമാണെന്ന് യോഗം വിലയിരുത്തി. കോൺഗ്രസ് മണ്ഡലം പ്രസിഡൻറ് എസ് ഷെരീഫിന്റെ അധ്യക്ഷതയിൽ കൂടിയ യോഗത്തിൽ നഗരസഭ അംഗങ്ങളായ കെ.ആർ വിജയകുമാർ , പന്തളം മഹേഷ്, സുനിതാ വേണു , രത്നമണി സുരേന്ദ്രൻ , എ നൗഷാദ് റാവുത്തർ , പി എസ് വേണു കുമാരൻ നായർ , ഇ എസ് നുജുമുദീൻ , പി പി ജോൺ , ജി അനിൽകുമാർ , ബൈജു മുകടിയിൽ , ശാന്തി സുരേഷ് , വിനോദ് മുകടിയിൽ , രാഹുൽ രാജ് , അഭിജിത്ത് മുകടിയിൽ , മുരളീധരൻ , തുടങ്ങിയവർ സംസാരിച്ചു.
